Mange ville ta turen med hesten Perlo og Kjersti Hjelmeland under Jul i Rosendal. Snøen gav perfekte rammer til arrangementet.

Førjulsmagi med Jul i Rosendal

Det var upåklageleg julestemning i sentergarasjen i Rosendal i helga. Både arrangørar og utstillarar melder om ein magisk dag, med snø, sol og julemarknad.

Marie-Louise Knoop
Journalist
Journalist
Publisert

Ein skulle ikkje tru at eit parkeringshus kan by på så gode luktar og fin atmosfære, men når Kristin Lamberg og alle dei andre i foreininga Jul i Rosendal har utøvd magien sin, er det rett og slett utruleg koseleg plass å vera.

MYKLE Alpakka og Heimvik Alpakka sto saman og selde produkt av alpakkafiber.

– Det har vore ein fantastisk dag! Me var jo så heldige med vêret! Eg var oppe klokka fem og måka, ler Kristin Lamberg.

Kjekt for utstillarar

Det var kring førti utstillarar som selde varene sine, og ein stadig straum av folk kunne få tak i både handverk og handarbeid, god mat og julegodteri, kunst og julepynt.

Belno Sukkerfe selde julegodt, her var det mange som la inn eit stopp for å sikra seg julegodtet.

– Utstillarane og gjestene våre var veldig nøgde. Det er ikkje berre sal som er viktig for dei, men også interesse frå publikum, å treffa folk som er interesserte i det dei held på med. Her i Rosendal får dei det, og det er kjekt for dei å koma hit, fortel Lamberg.

Det var også mykje anna som bidrog til julestemninga. Her var det mogleg for ungar å køyra med slede, trekt av hesten Perlo. Dei kunne også vera med på forteljarstund med Gunvor Mehl, der Vivi-Ann Brede spelte gitar og dansa, og Kristin Schulerud spelte piano.

Det var nærmast fullt på begge forteljarstundane i Guddalshuset.

Rosendal Songlag og B-gjengen i Rosendal Musikklag sytte for god musikk. Det same gjorde sjølvsagt Remi Nerhus, som var DJ med stemningsfull julemusikk på repertoaret.

Rosendal Songlag laga julestemning med julesongar, leia av dirigent Christian Meaas Svendsen og akkompagnert av Bjarne Øymyr på piano.
Inne i senteret var det engleverkstad.
Mathilde, Kristine og Sigrun var tre av årets nissejenter. Annbjørg Fossberg som linselus for anledninga.
Sondre Bøyum i Rosendal Speidergruppe steikte lappar til den store gullmedaljen.
Mette Friheim i kjent stil - alltid med eit smil.
Det var mykje forskjellig å finna denne laurdagen.
Bier og fruktproduksjon høyrer saman. Her fekk ein både eplesaft og honning.
Kjekke kjeks hadde med seg julepynta peparkaker.
Mange ville sjå kva Knut Riise frå Dreiebuo hadde med seg i år.
Elin Søfteland Iversen hadde tatt med seg mykje forskjellig keramikk.
Brødskreppa Lene Monsen haldt dei frammøtte mette med deilige bollar og brød.
Linda Sundal Utne og dattera Amalie stilte med heimelaga lys og armband. - Eg har laga lys i snart eit år, og det er Amalie som lagar armbanda, sa Linda.
Garden på Dalland serverte deilige grillpølser.
Radarparet Kristin Lamberg og Trygve Torjusen ordnar opp når noko skjer.
Gjuvsland biegard selde honning «frå flittige bier på Varaldsøy»..
Det var som sild i tønne i parkeringshuset store delar av laurdagen.
Det vart fine englar.
Nokre av Kjell Musland sine fantastiske trefigurar.
Kjersti Hus hadde strikka masse votter og anna fint.
Fine englar av Elin Søfteland Iversen.
Det strøymde på med folk til Jul i Rosendal. - Ein heilt fantastisk dag, oppsummerer Kristin Lamberg.
nyhende biletseriar nyhende
Powered by Labrador CMS