Førjulskonsert i Fatlandskogen
Søndag 4. desember er både store og små invitert til opning av den nye scena i Naturstien i Fatlandskogen på Halsnøy.
Publisert
Sist oppdatert
I samband med opninga av den nye scena i Naturstien, er det lagt opp til mange kjekke aktivitetar for både store og små.
– Alle er velkomne til ein uformell konsert midt inni svartaste Fatlandskogen. Det blir tusenvis av smålys i området, men ha gjerne med deg ei lommelykt, eventuelt på mobilen, står det å lesa på Fatlandskogen si nettside.
Annonse
Lokale artistar
Før konserten kjem nissen og spelar nisselåtar på nissefjøla si, i nisseskogen ved «Det lange bordet». Deretter kjem lokale artistar og held konsert ved den nye scena.
– Det blir konsert, uansett vêr. Det kjem ultralokale artistar, og kanskje eit par spesielt inviterte gjester. Tribunen har sitjeplass til 75 personar, pluss haugevis av ståplassar, skriv arrangøren og held fram:
– Me prøver oss fram i år med eit opplegg som kanskje kan bli ein årviss tradisjon. Kom gjerne med forslag og idear til korleis det kan bli endå betre neste gong, skriv arrangøren, som legg til at nissane har fått seg eit mykje større og finare hus enn det falleferdige dei hadde i fjor.
