Forhandlingane har starta: – Det meste av busstrafikken i Vestland vil stoppa

Fredag starta meklinga i lønsoppgjeret for frontfaget. Ein eventuell streik vil stoppa mesteparten av busstrafikken i Vestland, skriv Skyss.

Klokka 10 fredag føremiddag starta meklinga mellom LO, YS og NHO på Hotell Opera i Oslo sentrum. Om ikkje partane vert einige innan midnatt natt til søndag, kan Norge vakna opp til eit labert kollektivtilbod måndag morgon.

Buss og ferje kan bli hardt råka av streik

– Det aller meste av busstrafikken i Vestland vil stoppa dersom det blir streik, inkludert skuleskyss som vert køyrd med buss. Bybanen vil også stå, og fleire båt- og ferjesamband vil stå eller bli redusert, skriv Skyss i ei pressemelding fredag ettermiddag.

Redusert ferjetilbod

Enkelte stadar vil det gå nokre enkeltavgangar med buss, og skuleskyss som vert køyrd med taxi vil i hovudsak ikkje bli påverka.

– Partane i konflikten møter hos Riksmeklaren med frist ved midnatt natt til søndag 11. april. I tråd med spelereglane som gjeld for lovlege arbeidskonfliktar, ser Skyss ikkje inn kompenserande tiltak for å bøta på konsekvensane av streiken. Reisegarantien gjeld ikkje ved streik, skriv Skyss.

For Kvinnherad får dette konsekvensar både for buss og ferje.

– All busstrafikk vil stå i ruteområdet Sunnhordland og ferjetilbodet på Gjermundshamn-Årsnes og Skjersholmane-Ranavik vil bli redusert, kjem det fram i pressemeldinga.