Føreslår varaordførar i 50% stilling

Sp, Ap og SF går inn for å auka stillinga til varaordføraren frå 15 til 50%. Årsaka er stor arbeidsmengd og ei ekstra satsing på nærings- og utviklingsarbeid.

Det kjem fram i ein høyringsuttale dei tre partia har sendt i samband med «Forskrift om folkevalde sin rett til godtgjersle etter kommunelova og velferdsgode i Kvinnherad kommune». Partia meiner varaordføraren både skal ha 50% stilling og få utbetalt 50% av ordføraren si løn. Løna skal inkludera all møtegodtgjersle, medan eventuell godtgjersle for styreverv i selskap og organisasjonar, som følgjer av vervet som varaordførar, skal tilfalla kommunekassa.

I uttalen vert forslaget grunngjeve slik:

«I følgje reglementet må Varaordførar til ei kvar tid vera oppdatert på dei oppgåvene som ordføraren har, og dei saker som er av særleg interesse for kommunen. Varaordføraren skal til ei kvar tid vera budd på å tre inn i ordførarvervet på kort varsel. Det følgjer av det ovanståande at dette ikkje er mogeleg på ein god måte i 15 % stilling, noko som tilsvarar mindre enn 1 dag pr. veke».

Tiltakssjef

I tillegg vert det vist til at ordføraren er kommunen sin tiltakssjef. Også folketalsutviklinga vert trekt fram.

«Ordføraren skal halda seg orientert om saker av særleg interesse for utvikling av kommunen, og ta initiativ til at desse vert lagt fram for politisk organ. Det er umåteleg viktig for utviklinga av kommunen at kommunen si politiske leiing har kapasitet til ei ekstra satsing på dette området. Kommunen har nedgåande folketalsutvikling, og det må ein større innsats for å få denne utviklinga til å snu. Nærings- og utviklingsarbeid må ha mykje større fokus i det politiske miljøet», heiter det.

Samarbeidspartia meiner forslaget vil ha små økonomiske konsekvensar.

«Økonomisk kostnad for kommunen vil i stor grad gjelda pensjonskostnad, då løna truleg vil vera lik når denne skal dekkja all politisk verksemd utan rett til tap av arbeidsforteneste», analyserer dei.