Føreslår ungdomsbillett lenger enn til 21 år

Synnøve Solbakken (Ap) meiner det er for ungt å setja aldersgrensa ved 21 år for fylket sin ungdomsbillett på bussar og båtar.

Vestland fylkeskommune tilbyr ein 30-dagars ungdomsbillett frå fylte 16 år og fram til den månaden passasjeren fyller 21. Billetten kan brukast på alle bussrutene til Skyss, Bybanen i Bergen og snøggbåtane i fylket. Etter at ordførar Hilde Enstad (Ap) orienterte kommunestyret om eit eventuelt svar på Bergen kommune sitt forsøk på å lokka studentane til å melda flytting, trekte Synnøve Solbakken (Ap) denne ungdomsbilletten inn i saka.

– Det går andre vegen òg. Det er ungdomar som bur i Bergen som søkjer til Kvinnherad på sommarjobb og helgejobb, og som nyttar seg av båttilbodet. Studentkortet/ungdomskortet går opp til 21 år, men då er ungdomane nett byrja på studiane sine, sa ho.

Solbakken oppmoda difor ordføraren om å jobba for at aldersgrensa vert utvida.

– Det blir veldig dyrt for ungdomane å bruka båten. Dei har nesten ikkje igjen for ein helgejobb dersom dei skal betala full pris. Dette er Kvinnherad si moglegheit til å trekkja til seg ungdomar og behalda dei vi allereie har, understreka ho.