Føreslår å utsetja fleire investeringar

– Kvinnherad kommune har eit strålande utgangspunkt for å levera gode tenester til sine innbyggjarar. Inntektsgrunnlaget legg i alle fall til rette for det.

Det sa økonomisjef Niels Jakob Erlingsson då han overtok ordet etter kommunedirektør Leif Ove Mikkelsen under budsjettpresentasjonen på tysdag.

Han understreka mellom anna at gebyrnivået i Kvinnherad var historisk lågt i 2024. Ein viktig grunn til dei høge inntektene, er overføringane frå det statlege Havbruksfondet. Fondet vart oppretta i 2018, og har kvart år i snitt gjeve Kvinnherad heile 30 millionar kroner.

Men problemet for kommunen er at driftskostnadane har auka betydeleg dei siste to åra. Deriblant med over 37 millionar kroner til ikkje lovpålagte tenester. Likviditetsunderskotet dei siste to åra har vore på totalt 100 millionar kroner.

– Det kan ikkje fortsetja. Kostnadsnivået i dag er for høgt. Kvinnherad er difor avhengig av ekstraordinære inntekter for å dekka driftskostnadane og lånekostnaden på investeringane. 2025 blir eit litt krevjande år for Kvinnherad kommune, og det er budsjettert med eit stort likviditetsunderskot igjen. Omstilling tek tid, analyserte Erlingsson.

Effektivisering

I budsjettet for 2025 føreslår kommunedirektøren å setja av 583 millionar kroner til sektoren for omsorg, 394 mill. til oppvekstsektoren og 98 mill. til Sektor for teknikk og miljø.

Når det gjeld økonomiske prioriteringar neste år, trekte Niels Jakob Erlingsson fram følgjande fem punkt:

* Effektiviseringskutt på 13 millionar kroner fram til 2027.

* Kutta driftskostnadane med 5 mill. i 2025.

* Innføra effektiviseringsprosess for å kutta 0,5% av budsjettet årleg i fem år.

* Strukturelle endringar knytt til organisering og tenesteleveranse med effekt frå 2027.

* Skyva på investeringsprosjekt til eit 20-års perspektiv.

– Effektiviseringsprosessen må ha effekt i 2025 for at det ikkje skal bli nødvendig å innføra eigedomsskatt igjen, åtvara økonomisjefen.

Idrettshall

For å få økonomien og likviditeten til å henga i hop, føreslår kommunedirektøren å utsetja ein del investeringar. Følgjande prosjekt vart i denne samanheng trekte fram:

* Vedlikehald Oppvekst til 2029-2037.

* Områdeplan Sunde til 2031-2032.

* Personalbase og bustader Rus og psykiatri til 2032.

* Kvinnheradpakken II til 2032-2034.

* Idrettshall i Rosendal til 2035.

* Bufellesskap for eldre til 2036.

* Større bustader til 2037.

Barneskule og helsehus

Men trass dette skal det likevel investerast mykje dei komande åra. Sentrale investeringsprosjekt framover er desse:

* Ny barneskule på Husnes i 2026.

* Heradstun i Rosendal i 2025.

* Helsehus på Husnes i 2026.

* Bustadutvikling 2025-28.

* Kvinnheradpakken 2026 (42 mill.).

* Kollektivknutepunkt Husnes 2025.

* Valen skule 2028. Ramma er på 75 mill.

* Bufellesskap Husnes 2028.

Så gjenstår det å sjå om politikarane er samde. Budsjettet skal endeleg vedtakast i kommunestyret 12. desember.