Foreslår å forlenge straumstøtta til mars 2023

For å rekke å forlenge ordninga slik at det har innverknad på straumforbruket i april, er høyringsfristen sett til 15. mars.

– Eg er glad for at vi i dag kan forsikra norske straumkundar om at regjeringa i eit heilt år framover skal bidra til å redusera kostnadane for folk når prisane er ekstraordinært høge. Det gjev betre føreseielegheit og tryggleik for eigen økonomi, seier olje- og energiminister Terje Aasland (Ap) i ei pressemelding.

Det er ikkje foreslått å endre utforminga på ordninga, berre lengda. Dermed vil hushaldningane få støtte til eit straumforbruk på opp til 5000 kilowattimar av forbruket per månad.

Den mellombelse ordninga fungerer slik at når marknadsprisen på kraft i gjennomsnitt går over 70 øre per kilowattime for ein månad, vil staten kompensere 80 prosent av prisen som overstig dette nivået.

Gjeld også for jordbruket

Straumstøtta for jordbruks- og veksthusnæringa skal også forlengast ut mars 2023.

– Når vi forlenger ordninga, viser dette at regjeringa prioriterer landbruket svært høgt. I ei tid der rammevilkåra for norsk matproduksjon endrast svært raskt, er det naudsynt at vi bidreg til å ivareta næringa sitt behov for stabilitet og langsiktigheit, seier landbruks- og matminister Sandra Borch.

Også dette forslaget skal leggjast fram for Stortinget.

Veksthusnæringa vert kompensert for høge straumprisar

Taper 100.000 kroner på julestjernene