Foreinar krefter for kjernekraftmøte
Kvinnherad INP og «Podlen kjernekraft AS» ynskjer å setja kjernekraft på dagsordenen, og inviterer til ope møte om temaet.
Publisert
Kvinnherad INP og «Podlen kjernekraft AS» skipar til eit ope møte om kjernekraft sin rolle i framtidas energisystem. Arrangementet finn stad i Festsalen, Kulturhuset Husnes, onsdag 25. september.
– Kvelden byr på fagleg påfyll og høve til samtale, lover arrangørane, som har eit programmet på plass, som mellom anna inneheld foredrag av Martin Nødland Hjelmeland, postdoktor og forskar ved NTNU.
Annonse
Han spesialiserer seg på energisystem, med særleg fokus på kjernekraft si rolle.
Spørsmål og debatt
– Etter foredraget vert det ordskifte der publikum også kan stilla spørsmål til Hjelmeland. Ein av landet sine fremste ekspertar på kjernekraft er frå Omvikdalen. Me har lenge hatt lyst til å få laga til eit foredrag med Martin her i kommunen, seier Gaute Lund frå «Podlen Kjernekraft AS» i ei pressemelding i samband med møtet.
Ønsket om å løfta debatten om kjernekraft i Noreg er også forankra i Kvinnherad INP.
Annonse
– Dette møtet er ikkje berre for kjernekraft-entusiastar, men for alle som er interesserte i framtida sine energiløysingar. Me vonar folk med ulike syn kjem og høyrer på, seier lokallagsleiar Ellinor Rein i pressemeldinga.
Ho får støtte av partikollega Gunnar Helleland.
– Kvinnherad INP meiner at det er viktig med open og kunnskapsbasert dialog om energiløysingar. Me vonar at mange vil koma for å delta i samtalen, legg han til.
– Kunnskapsbasert debatt
– Me i «Podlen Kjernekraft AS» er engasjerte på fleire område for å stimulera til kunnskapsbasert debatt, vitskap og kritisk tenking, uttalar Karl Petter Vårdal, initiativtakar bak «Podlen kjernekraft AS» i pressemeldinga.
Han lovar ein inspirerande og lærerik kveld. Målet er at folk kan få faktabasert kunnskap og stilla spørsmål om kjernekraft si potensielle rolle i det norske energisystemet.
Annonse
Arrangørane understrekar at møtet er gratis og ope for alle interesserte, uavhengig av standpunkt i kjernekraftdebatten. Informasjon om tidspunkt vil bli kunngjort seinare.
– Me oppmodar alle interesserte om å setja av kvelden og delta i det som lovar til å bli ei lærerik og engasjerande økt om kjernekraft, sluttar dei sameinte kreftene.
