Førebur seg på å ta i mot ukrainske flyktningar

Onsdag nytta kommuneleiinga høve til å informera om kva som blir gjort og kva som må gjerast framover for å handtera dei lokale ringverknadene av krigen i Ukraina.

– Me er bekymra for situasjonen. Kvinnheringane har uttrykt eit behov for å hjelpa. Me veit at det er ukrainarar på veg Kvinnherad, til bekjente dei har her. No førebur me organisasjonen på å ta i mot flyktningar. Det er viktig å uttrykka støtte til det ukrainske folk. Og så er det vår oppgåve å ta godt i mot dei når dei kjem, og leggja til rette for eit godt opphald, seier ordførar Hilde Enstad om stoda.

Primære behov

Kommunedirektør Ragnhild Bjerkvik påpeika at det å dekka dei primære behova kjem først.

– Dei må få ein god plass å bu. Me byggjer opp gode bustader i Husnes- og Rosendalsområda. Desse må me rigga på kort tid. Førebels bruker me kommunen sine eigne bustader til dette. Seinare kan det bli aktuelt å be om initiativ frå private. Dette er ein situasjon som endrar seg fort, forklarer Bjerkvik.

Kommunen tar sikte på å byggja opp eit lokalt mottak på Husnes.

– Det er viktig å få barna raskast mogeleg inn i skule eller barnehage. Me treng utstyr til dei som kjem. Det er det me først og fremst ynskjer hjelp til. Senger, dekketøy, kvitevarer, og så vidare. Dei som kjem hit har minimalt med seg. Det er kvinner og barn som kjem no, etter kvart eldre. Førebels veit me ikkje kor mange som kjem. Dei som me er varsla om, er kopla mot andre ukrainarar som allereie bur i Kvinnherad, seier kommunedirektøren.

Ordføraren kan opplysa om at det er 21 registrerte ukrainarar i Kvinnherad pr. no.

– Me er ein stor organisasjon, med både ukrainske og russiske tilsette. Dette er ikkje ei konflikt me tar ned til vårt lokale nivå. Me skal ta godt vare på dei alle, inkludert barna også, understrekar Bjerkvik.

Står løpet ut

Både ordførar og kommunedirektør løftar fram at mange i Kvinnherad ynskjer å bidra.

– Me klarer ikkje å svara opp alle som tar kontakt. Dei er likevel ikkje gløymte, og me tar opp tråden etter kvart som me får kapasitet. Me ber om at dei som har noko å bidra med kontaktar oss på e-postadressa ukraina.flyktning@kvinnherad.kommune.no. Me vil oppdatera heimesidene våre med informasjon fortløpande, lova dei.

Beredskapssjef Gunn Tove Petterteig bad om at det som folk vil gje i frå seg, er i god stand, slik at det varer hos dei som kjem hit.

– Me byrjar å bli gode på å handtera kriser etter kvart, og håper me står dette løpet også. No skal me tilretteleggja gode tilbod til dei som kjem hit og treng hjelp, sluttar kommunedirektøren

Politiet: – Registrering skal gjerast i Råde

Då politistasjonssjef Sigurd Børve starta sin del av informasjonsrunden, var han tydeleg på at i saker som dette, utviklar situasjonane og behov seg ofte veldig raskt. Som ei følgje av det blir også regelverk tilpassa nærast fortløpande.

– Informasjonen som eg kjem med er det som ligg på politiets portalar no, men dette kan endra seg allereie i løpet av dagen. Me er kjente med at det er på veg – og kanskje allereie kome – ukrainske flyktningar til Vest politidistrikt, då via vener og kjente av desse. Det er det lov til i Schengen-området (biometrisk pass). Dette gjeld ikkje minst dei som ikkje treng hjelp til mat og anna. Alle utanom desse skal registrera seg, enten det gjeld asyl eller annan beskyttelse, informerer Børve.

All registrering skal gjerast ved det nasjonale mottakssenteret i Råde.

– I tillegg til registrering, blir det også innkvartering der i starten. Det blir jobba med å etablera regionale registreringsområde. Det er ikkje på plass no, men dette er klassisk eksempel på at desse tinga kan endra seg raskt. ID-nummer er noko som også blir ordna på det nasjonale mottakssenteret, men me skal hjelpa og bistå alle som kjem hit og treng hjelp, forklarer Børve.

Politiet har ei koordinerande rolle på transport av dei som skal til det nasjonale mottakssenteret. VY (tidlegare NSB) tilbyr gratis skyss til alle som vil til senteret. Børve tar atterhald med at det kan koma endringar frå dag til dag på desse felta.

– Det blir advart mot menneskehandel og personar som kjem som tredjelandsflyktningar som prøver å utnytta situasjonen, noko me også er vakne på, avsluttar politistasjonssjefen.