Forbode å gå i land i sjøfuglreservata
I april startar sjøfuglane førebuingane til årets hekkesesong, og forbodet mot å gå i land i sjøfuglreservata langs kysten tar til å gjelda igjen. I Kvinnherad finst det seks slike reservat.
Publisert
Det skriv Statsforvaltaren i Vestland på si heimeside.
«Sjøfuglreservata er oppretta for å gi sjøfuglane fred i hekketida ved dei viktigaste hekkeplassane i fylket. Og det trengst, for det står dårleg til med sjøfuglane i heile Norge. Nedturen byrja like etter årtusenskiftet, då ein oppdaga at hekkeplassane stod tomme rundt heile Nordsjøen, og berre næringsmangel i stor skala kunne forklara noko slikt. Det er no litt over 20 år sidan den store kollapsen, og sjølv om situasjonen betra seg litt i nokre år etterpå, er den generelle trenden no ein vedvarande nedgang for alle artar. I Hordaland har fleire sjøfuglreservat stått tomme i fleire år, medan det i Sogn og Fjordane framleis er hekkande fuglar i dei fleste av dei», står det i artikkelen.
Annonse
Statsforvaltaren slår fat at det handlar om store negative endringar.
«Medan sjøfuglane før årtusenskiftet laga liv og røre på det meste av skjer, holmar, øyer og fuglefjell på Vestlandet, er det no berre rundt 20% igjen av hekkebestandane. Om ikkje sjøfuglane klarar å få fram fleire ungar til vaksen alder, vil nedgangen halda fram. Men dette føreset at det blir meir mat å finna, og det er langt frå sikkert», vert det opplyst.
Kollaps
Årsakene til kollapsen er fleire: Overfiske og endringar av gyteområde har ført til at småfisk og yngel ikkje lenger kjem drivande nordover med kyststraumen på same måte som før, og havet blir varmare.
Annonse
«For kvart år blir det derfor viktigare og viktigare at sjøfuglane får vera i fred i hekketida, både i og utanfor verna område, slik at i alle fall nokre av dei kan få fram ungar. Verken egg eller små ungar kan regulere temperaturen sjølv, og er avhengige av at foreldra er til stades og vaktar og varmar dei. Går du på land på ein holme med hekkande fuglar ein kjølig eller regnfull dag, vil alt av egg og ungar stryka med etter 15-20 minutt. Men også på varme dagar kan ilandstiging føra til stor skade, for då stryk egg og ungar med av varmen dersom foreldra blir jaga unna og ikkje kan skugga for dei», informerer Statsforvaltaren.
Reservat i Kvinnherad
I Kvinnherad har vi følgjande naturreservat for sjøfuglar: Prestnesholmen i Kaldestadvika, Hillekalven og Pasholmen ved øya Hille i Klosterfjorden, Fjæraskjer nordaust for Fjelbergøy, Raudholmane søraust for Halsnøy, Terneskjeret i Høylandssundet, og Trollskjeret ved Store Lauvøy mellom Halsnøy og Valen.
