For små forhold i bussen
Hildegunn Aase, leiar ved Brystdiagnostisk senter ved Haukeland universitetssjukehus, fortel at vurderinga Helse Bergen har gjort med å ikkje sende mammografibussen til Kvinnherad er grunngjeve med smittevernrestriksjonar i samband med pandemien.
Publisert
– Denne avgjerda er knytt til dei små forholda i bussen, som har gjort det umogleg å halde god nok avstand i samband med dei anbefalte smittevernreglane. Venterommet på bussen er heller ikkje stort nok til at fleire kan opphalde seg der samstundes, forklarar Aase og legg til at arbeidssituasjonen for radiografane også er langt frå optimale i bussen.
Vidare forklarar ho at situasjonen er ein heilt annan på Danmarksplass, kor det er mykje større lokale og det er mogleg å halda god avstand, både for pasientar og behandlarar. Aase understrekar at dei oppmodar alle som har fått invitasjon til å delta på programmet, sjølv om det inneber å reise ut av kommunen.
Annonse
– Vi oppmodar veldig sterkt alle kvinner som får invitasjon til å møte opp. Vi ser at mange tenker at om det ikkje er brystkreft i familien, så treng dei ikkje denne undersøkinga. Men dei aller fleste som får påvist brystkreft har ingen i familien som tidlegare har hatt det, informerer ho.
Grunna utviklinga som har skjedd med tanke på vaksinering og smittesituasjon frå i vår og fram til no, skal mammografibussen etter planen igjen nyttast når det i haust er kvinnene frå Bømlo, Stord, Fitjar og Onarheim på Tysnes sin tur til å undersøkast. Alle andre kommunar i tidlegare Hordaland har dette året blitt invitert til Bergen.
