– For dei som ikkje har utømelege mengder på konto er det jo dramatisk!

Det var mogleg opp mot 300 menneske som tok turen til den to timar lange markeringa på Torgallmenninga i Bergen, sist torsdag.

– Alvoret tatt i betraktning burde det kanskje ha vore mange fleire, men det heile vart godt gjennomført med fornuftige og gode appellar. Eg forstår jo at det ikkje var fleire som kom, for då me var ein time uti markeringa byrja det verkeleg å høljeregna. Då var det fleire som gjekk, fortel ho.

Konstituert i eit kommentarfelt på Facebook, no riggar dei for Bergensopprøret

Sterke appellar

Blant dei som hadde takka ja til å halda appell var representantar frå det frivillige; Kveldsvakten, Hjerterom, Robin Hood-huset og Matsentralen. Appellantane stilte ifølgje Døssland med sterke innlegg som var med å prega markeringa.

– Matsentralen fortalte til dømes at dei ikkje har nok mat å dela ut til folk som treng det. Og dette er jo i byn, ein har like utfordringar på bygdene i distriktet. Og Torstein Dahle, som er utdanna siviløkonom, meinte at vi berre har sett starten på utfordringane. Eg synest det er skremmande!

Etter aksjonen gav både publikum og politikarar uttrykk for at dei sette pris på arrangementet, som sette fokus på dei høge prisane på straum, mat og drivstoff.

– Fleire av dei som var der takka oss for at vi tok det opp, og meinte det var viktig å halda trykket oppe. Eg sa til politikarane at dei måtte ta det med heim til sine, seier den utflytta uskedelingen før ho engasjert held fram:

– Prisane har stige noko heilt vanvittig, og det er mange som slit. Straumstøtta verkar å vera ei kvilepute for enkelte. Men folk er nok litt meir forsiktige med å bruka pengar no, noko småbedriftene merkar. Det er ei frykt for at det kjem fleire konkursar i tida framover, det er så trist!

Støttar einannan

Demonstrasjonskvartetten Døssland er ein del av har førebels ingen planar om å skipa til ein ny aksjon, men dei vil delta på liknande markeringar som blir stelt i stand av andre.

Her blir mellom anna «Kraftaksjonen» nemnd, som vil bli arrangert av ei gruppe knytt til Sascha Liberté, ein aktiv motstandsmann i saka om høge straumprisar. Ifølgje Nettavisen har han ikkje betalt ei einaste straumrekning i heile 2022. «Sascha Liberté» er ikkje mannen sitt eigentlege namn, men eit namn han nyttar på internett.

– Gruppa til Sascha Liberté stilte opp for oss i forkant av Bergenopprøret. Dei hadde kopimaskin og trykte opp 15.000 flyers og 300 plakatar som dei delte ut og hengte opp, det var heilt fantastisk! Dei skal arrangere «Kraftaksjonen» om fire veker, der det blir marsj med endestopp på Torgallmenningen. Der kjem iallfall eg til å stille opp for å vise støtte, slår Døssland fast.