Fonneland og farmor

Her skal forfattaren snakka om bakgrunnen for arbeidet sitt med romanen Sognerosa. Det vert biletframsyning, og forfattaren vil fortelja om staden, miljøet og personane som boka handlar om.

«Sognerosa er ein roman om venskap, solidaritet og kjærleik. Sognerosa er ein roman om å bli sterk nok til å ta eigne val», står det i pressemeldinga.

Handlinga i Sognerosa tek utgangspunkt i miljøet i Vangsnes i skiftet mellom 18- og 1900-talet. Fonneland sin bestefar kom opp til Sogn for å jobba med skipsbygging, og møtte det som skulle bli bestemor til forfattaren. Forfattaren har nøsta i historiske arkiv, og funne ut at bestemor Ingeborg Havneraas var ført opp som den fyrste næringsdrivande kvinna i Sogn og Fjordane.

Sjølv om romanen tek utgangspunkt i verkelege personar og miljø, er handlinga likevel fiksjon – der oppveksten til bestemor Ingeborg har vore inspirasjonen. Anne Karin Fonneland skal fortelja om både kunstnarar, turisme og kraftutbyggjing i Sogn på denne tida, men óg litt om handlinga i boka.