Folkehøgskulen startar smykkedesignlinje

Årshjulet til folkehøgskulen er kanskje litt annleis enn det er for andre skular. Allereie 16. september måtte neste skuleårs linjer vera meldt inn, då arbeidet med trykt katalog for alle landets folkehøgskular startar.

Ved Sunnhordland folkehøgskule kjem dei til neste år til å tilby to aldeles nye linjer, inkludert ei linje dei er aleine om i landet.

Kreativt

– Ein held korta litt tett til brystet når ein vil starta opp nye linjer, slik at ein får ha ideen sin i fred. Smykkedesign er ny linje hos oss. Det er 84 folkehøgskular i landet, og ingen andre som har tilbyr dette, så sant me har klart å sjekka rett. Me ynskjer også å tilby ei ny folkemusikk-linje. Den forma me har her, er det heller ingen andre som, meiner rektor Bente Sjo.

Ettersom Sunnhordland folkehøgskule er ein kreativ folkehøgskule, er det ikkje sjokkerande at det var ein musikklærar som foreslo at dei skulle starta smykkedesignlinje, og at det var ein kunstlærar som foreslo folkemusikklinja.

– Eg har jobba mest med å få fram smykkedesigndelen, og blant anna vore med ein dag med Atle Fredheim. Me er jo ikkje ein gullsmedskule, men med smykkedesign er det metallarbeid. Det er mykje som ligg i førearbeidet til å starta ei linje, mellom anna å laga ein eigen verkstad. Det igjen fordrar at me får elevar, og me veit ikkje no om me får 10 eller 25 eller 2, seier Sjo.

Ho skryt uhemma av alle som har hjelpt dei med innspel til korleis folkehøgskulen kan tilretteleggja linja.

– Uansett kor me har snudd oss, så har me blitt tatt i mot med opne, rause armar. Dette er ikkje ei gullsmedlinje, men det er likevel mange gullsmedar som har støtta oss i førebuingane, seier Sjo vidare.

Endring

Folkemusikklinja er heller ikkje tenkt som den tradisjonelle, norske folkemusikken.

– Å fordjupa seg i nyskapande folkemusikk, er det me vil tilby til elevane. Me håper å få elevar som kjem med sin tradisjon, og som kan inspirera vidare, påpeikar rektor.

Sunnhordland folkehøgskule har etter måten høgt fagfokus, der elevane har 21 linjetimar i veka. Andre skular er kanskje nede i 10 timar, og så fyller dei ut resten av timeplanen med valfag.

– Det blir eit år med fagleg fokus, uansett kva linje eleven vel hos oss. Smykkedesign er nok den mest spennande, og me spelar på at me er kreative, det er det som er i fokus hos oss.

– Dei som kjem som vårt første kull på ei linje skal ikkje kjenna seg som prøvekaninar, dei skal ha eit fullverdig tilbod frå dag 1. I år er det 69 elevar, men me har plass til 100. Dei elevane som er her no er dei viktigaste elevane me har, seier Sjo og understrekar kvar hovudfokuset til skulen ligg.

– Me veit at samfunnet er i endring, og me merkar det på elevane. Me skal ikkje hiva oss på trendar som er døgnfluger, men me må endra oss for å tilby noko som er ønska der ute, og me vil vera ein plass som elevar kjem til, seier ho avslutningsvis om dei to nyskapingane bed Sunnhordland folkehøgskule.