Folkehelsepris til Turstiar Sunde og Bjørn Heimvik

Det vart feira med både rjomegraut og marsipankake då Husnes og Valen Helselag inviterte til utdeling av folkehelseprisen for Hordaland i 2024. På mottakarsida stod Bjørn Heimvik og Turstiar Sunde, som på fortent vis vart heidra for å ha fått folk ut på tur i over 15 år no.

Samrøystes styre

– Nasjonalforeininga er organisasjon bak helselag og demensforeiningar. Fylkesstyret deler ut pris etter innkomne forslag. Me foreslo Turstiar Sunde og Bjørn Heimvik, og er glade for å bli høyrde på forslaget vårt, sa nestleiar i Husnes og Valen helselag Elsa Helland då prisen skulle delast ut.

Sjølve overrekkinga fekk dagleg leiar til fylkeslaget Kristine Drake stå for. Ho las mellom anna opp grunngjevinga som gjorde at fylkesstyret samrøystes stilte seg bak å gje årets pris til Bjørn Heimvik og Turstiar Sunde.

– Turstigruppa lagar, ryddar og vedlikeheld turstiar i Sunde- og Husnes-området. Gruppa har eksistert sidan 2008, og dei har laga 22 turstiar, lavvoar og hytter, og legg ned cirka 2500 dugnadstimar pr. år. Den siste tida har dei laga informasjonstavler i alle hytter, og skilta langs alle stiane, las ho frå nominasjonen.

– Fire årlege arrangement for barn og barnefamiliar i tilknyting til arbeidet dei elles utfører. Turstiane er mykje brukt, og til glede for dei som nyttar dei. Husnes og Valen Helselag meiner er den rette kandidaten til å få årets Folkehelsepris, refererte Drake vidadre før ho overrekte det synlege provet på prisen, eit vakkert trykk.

– Utfarten er vår rikdom

Bjørn Heimvik takka hjarteleg for prisen.

– Denne heng kjempehøgt hos oss også. Det vart sagt mykje fint i innleiinga, og me har gjort forholdsvis mykje bra sidan starten i 2008, tykte Heimvik sjølv.

Han peika på at brukarane av stiane og hyttene er folk frå heile kommunen, pluss turistar. Det har blitt 22 løyper og 20 skilt til no, der turstien langs Opsangervatnet er av dei mest brukte, saman med Kaldestadåsen og Bjellandsbu på Sunde.

– Det viser det som er vårt mål; få mange ut i aktivitet. I 1997 var det 4000 som skreiv seg i boka på Kaldestadåsen. No er talet 20.000, eksemplifiserte Heimvik.

– Me har det bra, noko som truleg er grunnen til at me rundar 50 dugnadstimar kvar veke. Me samarbeider med mange om prosjekta, og får støtte frå mange. 38.000 er innom og skriv i bøkene i rastehyttene vår. Den store utfarten i nærområdet vårt er rikdommen vår. Me har ikkje formue på bok, men i bok, sa Heimvik vidare.

Han slo fast at det er vedlikehaldsarbeidet som krev flest timar av turstigruppa, men Heimvik var klar på at det må til.

– Eg må få gje ei stor takk for prisen. Han er flott, og heng høgt. Me må kopiera han opp og få eksemplar ut i rastehyttene, avslutta Heimvik med.

Husnes og Valen Helselag hadde ikkje tenkt å vera verre enn fylkeslaget, og gav også ei gåve til Turstiar Sunde, ei pengegåve på 5000 kroner.

– Me håper det kjem til nytte, sa lokallagsleiar Anne Karin Fjellandsbø i samband med overrekkinga.

Heimvik forsikra ho om at det kom gåva til å bli.