– Folk må vere obs på dette

– Vi tok 22 ferja frå Tørvikbygd fordi vi visste at det var stengt på Kroka. Vi brukar kanskje eit kvarter meir den vegen og tenkte ikkje over det, men når vi kom til Austrepollen møtte vi plutseleg ein kø, fortel Hans Petter Jacobsen.

Dei møtte nokre store skilt som klart og tydeleg sa at vegen ved Krokahaugen er stengt mellom 21.00 og 05.00. At det skulle vere stengt fleire kilometer før sto ikkje opplyst nokon plass.

– Det minste dei kan gjere er å informera. Fleire av dei i køen var inne og sjekka 175.no, og det sto det òg på det store skiltet at ein måtte gjera, og der sto det at det berre var stengt ved Kroka. Vi sto der ei stund og lurte på om det var skjedd noko anna som gjorde at vegen var stengt, seier Jacobsen.

– Vi som fastbuande vart veldig overraska over at vi ikkje har sett informasjon om dette nokon stader, legg Benthe Bondhus til.

Heilt på trynet

Midt i vegen sto to bukkar med skrifta «vegen stengt» på. På den eine var det skrevet «køyring til eigedomar», men dette var vanskeleg å sjå.

– Det var veldig lite og såg ut som ein unge hadde skreve det. Vi måtte heilt fram til skiltet for å sjå kva det sto, og dei som var litt bak i køen hadde ikkje sjans til å sjå det, fortel Bondhus.

Medan dei sto der kom det ein bil med frå Vassbakk og stol, og dei fekk prata med vedkommande. Han meinte at vegen var stengt grunna sprenging og at dei måtte venta på som kom kvart på 12.

– Klokka var halv elleve om kvelden, og vi skulle jo berre til Sunndal, så dette meinte vi var for dumt. Det enda med at vi berre køyrde forbi, seier Jacobsen, og legg til;

– For å sei det på godt norsk så var dette heilt på trynet.

Jacobsenog Bondhus kom seg heim, men vil at andre skal vera klar over situasjonen.

– Eg har høyrd at på andre sida stenger dei så langt unna som Furebergfossen. Dette er viktig at folk er obs på, seier Bondhus.

Svar frå fylkeskommunen

Grenda har ringt Vestland fylkeskommune, Statens vegvesen og Vassbakk og Stol for å bringa dette vidare. Vegvesenet har ikkje noko med stenginga å gjere, men skulle sjekke om det var i deira system det var gjort ein feil med tanke på trafikkmeldingar. Vassbakk og Stol har ikkje kome tilbake til oss, men byggeleiar i Vestland fylkeskommune Terje Nesse svarar dette;

«Vegen er ikkje fysisk stengt i Austrepollen. På skilta med førehandsvarsel står det at vegen er stengt ved Krokahaugen.

For å hindre at folk som ikkje er kjende køyrer for langt, er det i Austrepollen satt opp ein bukk med skilt om at vegen er stengt, men at køyring til eigedomane er tillat, og det er plass til å køyra forbi.

Tilsvarande er gjort på vestsida ved Furebergfossen.

Entreprenør kjenner ikkje til at folk har blitt stoppa i Austrepollen».