Folk kansellerer - vi må ta støyten

Dette meiner Åge skapar ei unyansert framstilling av smittesituasjonen, som gjer det ekstra utfordrande å drive restaurant.

Det var klart for julebordsesong då smitten i Kvinnherad braut ut i midten av november. Timinga var såleis elendig for Gjøa, som har opplevd at om lag 60 % av bestillingane har vorte avlyst.

– Vi var i utgangspunktet fullbooka til juleborda, og ein god julebordsesong ville vore med å sponse lavsesongen for oss. Så når det blir mange avlysingar, slit vi ekstra i mørketida. Vi føler denne situasjonen råkar oss unødvendig hardt, for dette med smittevern ivaretar vi godt her i restauranten, seier ein oppgitt Sørensen.

Intensjonane til ekteparet Sørensen har heile tida har vore å halde sjømatrestauranten open heile året, noko ein god julebordsesong ville ha kunna bidrege til.

Høyres meir farleg ut enn det er

Noko av problemet meiner han ligg i at folk vert unaudsynt skeptiske når det til dømes kjem fram at smittetalet i kommunen er over 80.

– Sjølv om det er over 80 menneske som har blitt smitta, er det jo ikkje slik at det går 80 stykke sjuke rundt her i kommunen i dag. Dei blir jo friske igjen etter kvart, men det vert ikkje formidla, og situasjonen verkar dermed farlegare enn den eigentleg er. Det er dette eg reagerer på, for det blir så store konsekvensar for oss, held han fram.

Sørensen er tydeleg på at han ønskjer at koronasertifikatet blir innført, men om det skulle skje, vil det likevel ikkje koma i tide til å hjelpe på den siste månaden før nyttår.

Fortløpande endringar i opningstida

Konsekvensen er at dei må justere på opningstidene fortløpande, då dei ikkje har råd til å ha full stab på jobb når det ikkje er gjester.

– Då kjem plutseleg gjestene til låst dør, noko som også går ut over oss i lengda. Og dersom folk ikkje brukar oss, blir me mogleg nøydd å permittere, eller kutte enno meir i opningstidene. Vi får jo heller ingen økonomisk støtte slik det er no.

Han kjem difor med ei oppmoding til kommunen:

– Vi vil ha meir nyansert info om smittesituasjonen, eller total nedstenging.

Åge har også ei oppmoding til innbyggjarane:

– Vi meiner det er heilt trygt å gå ut og eta her. Dei fleste som kjem hit er over 20, friske og vaksinerte. Om folk vil ha eit slikt tilbod i bygda, må dei også nytta seg av det.

Avsluttningsvis lovar han kundane at dei ikkje skal gi seg, og informerer om at restauranten har mange kjekke idear som dei ønskjer å setja ut i live så snart den lokale smittebølgja har stilna.