– Folk har sakna sirkus, sagmo, hestepromp og popcorn!
Jan Ketil Smørdal og Cirkus Agora har sjeldant blitt like godt motteke som dei vart utanføre Husnes Storsenter denne veka. – Det var to fantastiske dagar med fulle hus! utbryt ein smørblid Smørdal.
Publisert
– Var du på sirkuset? spør han.
– Nei, eg var nok ikkje det.
Annonse
– Å ja, det var du som ikkje var der, ja. Elles var alle der. Det er sirkusfeber i Kvinnherad, seier sirkusdirektøren oppglødd i telefonen.
Og sjølv om journalisten ikkje akkurat får skryt for å ha missa ut på sirkusfeberen i kommunen, har Smørdal mykje ros på lager til Terje Børtveit, leiar i Husnes storsenter, for å ha lagt veldig godt til rette for flotte dagar med sirkus og baluba.
– Det har vore ein slik velvilje og unik tilrettelegging, eg har ikkje opplevd liknande på veldig lang tid. Eg er heilt imponert!
Tidenes sesong!
Annonse
Smørdal meiner koronaen har teke alt for mykje av den verdifulle tida vår, og på spørsmål om det har vore nokre år med sirkus-vakum svarar han:
– Det har det! Ja, det har det, det har det!
Leiinga ved storsenteret hjelpte til å planere området, dei la ut vatn og bidrog til å marknadsføra at sirkuset skulle koma dit.
– Det vart ein vinn-vinn situasjon for oss alle, slår sirkusdirektøren fast.
Dei 1500 menneska som fekk med seg «sirkus, sagmo, hestepromp og popcorn» desse dagane, vitnar i følgje Smørdal om at denne typen kultur har vore sakna.
– For sirkus Agora sin del har denne sesongen vore ein enorm opptur. Tidenes sesong faktisk, om eg skal snakka med meg sjølv.
