Folk frå fjern og nær tok turen til Fjellhaugen i påsken
– Vi har fått veldig fine tilbakemeldingar, seier Kent Are Kjørsvik Petterson dagen etter sesongslutt i alpinbakken.
Publisert
Sist oppdatert
Med påskehelga er også alpinsesongen ferdig, men så lenge snøen ligg i store nok mengder vil det bli laga løyper for langrenn enno ei stund framover.
– Påskehelga vart litt rolegare enn det vi hadde sett føre oss og ønskt, men vi er overhovudet ikkje misnøgde. Det har kome folk i frå fjern og nær, og det set vi stor pris på, seier han til Grenda.
Annonse
Dei konkrete besøkstala har ikkje den dagelge leiaren for skisenteret gått igjennom då Grenda er på tråden. Men i fjor hadde dei om lag ti dagar ope i trekket, medan dei i år har hatt minst det dobbelte. Likevel har det vore mindre trøkk i dagane dei har halde ope.
Startar arbeidet mot neste sesong
– No startar sommarsesongen, seier Kjørsvik Petterson, og legg til at det framover vil gå mykje tid og pengar til å leggja til rette for at neste alpinsesong blir knakande bra.
Målet er mellom anna å få på plass nytt styringssystem, noko dugnadsgjengen har oppretta en Spleis for å koma nærare full-finansiering.
Annonse
– Takk til alle dei fine og kjekke gjestene vi har hatt på besøk i alpinanlegget i vinter! Vi har kost oss med å sjå smilande og blide fjes, og håper vi får sjå dykk att til neste sesong. Då lagar vi til så godt vi kan, og vonleg vil vi ha litt nytt og spennande å by på, helsa gjengen i Fjellhaugen Skisenter sine besøkande på Facebook 2. påskedag.
