«Folk flest» har talt: Enova styrkar solsatsinga

Dette kjem fram i ei pressemelding frå Enova 2. februar. Gjennom ei undersøking som Kantar har gjort for selskapet, kjem det fram at smart staumstyring er det mest attraktive klimatiltaket for privatpersonar.

– Me aukar maksstøttesatsen og kor mykje støtte du får per installert kilowatt (kW) for å stimulere til at fleire tar i bruk og testar ut større solcelleanlegg i bustadmarknaden, samstundes som me lanserer støtte til smart straumstyring. Desse tiltaka er både kvar for seg, og i kombinasjon, veldig smarte klimaval, seier Nils Kristian Nakstad, som er administrerande direktør i Enova i pressemeldinga.

Dei som vil produsere eigen straum kan no få inntil 47.500 kroner i støtte, ei auke i støttesatsen på 21.250 kroner. Smarte straumsystem får inntil 10.000 kroner i støtte.

Private småkraftprodusentar satsar på solenergi

Vil gjere nye vurderingar ut frå responsen

Nakstad håpar desse auka stimuleringsmidlane vil setja fart på solmarknaden, sjølv om målet med endinga er å få fleire til å ta i bruk og teste ut større solcelleanlegg.

– Ut frå marknadsstatus vil vi vurdere nedtrapping av støttenivået etter å ha sett responsen i marknaden, seier han.

Klima- og miljøminister Espen Barth Eide (Ap) håpar at mange grip sjansen og set i gong tiltak som gjer at ein kan utnytte straumnettet betre.

– Eg er glad for at me no kan auke støtta til installering av solceller i private heimar. For den enkelte forbrukar betyr dette lågare straumrekningar og større oversikt over kostnadane. For fellesskapet betyr det at me kan frigjera verdifull kraft til andre viktige føremål, seier han.

Dette er tiltaka Enova no lanserer ny eller auka støtte til:

Smart straumstyring, solcelleanlegg, smart varmvassberedar, tiltaksbonus på vassborne anlegg, samt kartleggingsstønad til burettslag og sameiger.