Flyttar biogassanlegg til Husnes

Hardanger Biogass har skrive intensjonsavtale med Kvinnherad kommune om tomt ved Husnes Industriområde.

Intensjonsavtalen gjeld ei tomt mellom SIM og Hydro Husnes.

– Me har jobba mykje med dette i desember og januar. Ved å etablera oss på Husnes Industriområde vil me få litt høgare transportkostander, men me får samstundes ei større tomt, ferdig reguleringsplan, betre kai og vonleg synergiar med ein grøn næringspark, seier dagleg leiar Reinhard Lund-Mikkelson til Grenda.

Hardanger Biogass skal produsera flytande biologisk gass (LBG), som er tenkt å skulla overta for flytande naturgass (LNG) pumpa opp frå Nordsjøen.

– Me har gjort avtale med Gasnor om sal og transport av biogassen, fortel Lund-Mikkelson.

Anlegget skal bestå av siste generasjon teknologi som fangar, reingjer og kjøler ned metangass (CH4) til drivstoff for transportføremål på både land og sjø. Metangassen vert fanga gjennom ein lukka og naturleg utråtningsprosess av husdyrgjødsel og fiskeensilasje.

Bedrifta hadde først tenkt å etablere anlegget i Sandvikjo i Dimmelsvik, slik Grenda skreiv om i september 2019.

Den plasseringa var valt for å ha kortast mogleg veg og ha minst mogleg landtransport av husdyrgjødsel som er mest tilgjengeleg i Rosendal, Omvikdalen og Uskedalen.

Hardanger Biogass jobbar no vidare med finansieringa av anlegget, noko som er avgjerande for om selskapet går vidare med prosjektet.

– Me har nådd ein viktig milepåle i etableringsprosjektet med å få søkja investeringsstøtte hos ENOVA. Det vert stilt særs høge krav til ein slik søknad, og det er venta at søkjar har eit godt fundert prosjekt som er gjennomførbart og levedyktig, melder Lund-Mikkelson.

Går prosjektet etter den oppsette planen vil anlegget stå ferdig ila første halvår i 2021. Eit vilkår for det er at dei har finansiering på plass innan kort tid, og at naudsynte godkjenningar på plass innan rimeleg tid, presiserer Lund-Mikkelson.