Flyktningmottak på Husnes: – Viktig å byggja ein god grunnmur

Anna Kathrine Bjelland Mathisen er miljøterapeut i Kvinnherad kommune. Ho har fått rolla som flyktningkoordinator og er såleis fagansvarleg for arbeidet med å etablera mottaket i Lonabråtet på Husnes.

I ryggen har ho eit tverrfagleg team, som blir kopla inn ved behov. Dette for å sikra at flyktningane får den hjelpa dei har rett på.

– Her inngår til dømes psykisk helse, barn og familie, økonomi, og politi. Vi har eit tett og godt samarbeid med dei ulike einingane, og sjølv om dei ikkje vil vera tilstades på mottaket, har desse hjelpt oss å tenkje tverrfagleg, forklarar ho.

I tillegg til Anna Kathrine vil også Janne Hjønnevåg vera ein nøkkelperson som blir å møta på mottaket.

– Janne har vore gjennom snuoperasjonar før, mellom anna under covid. Når ein skal etablera eit slikt mottak før det er kome klare retningslinjer frå regionalt og nasjonalt hald, er det ein kjempefordel å ha nokon på laget som har god erfaring med korte fristar og endringar, forklarar ho.

Dermed er det desse to som vil ha hovudansvaret for å ta i mot flyktningane, både på kontoret og på andre plattformer. Det er nemleg etablert ei eiga telefonlinje og ein eigen e-post for integrering. Vidare vil all naudsynt informasjon på Kvinnherad kommune sin nettstad.

Riggar for lokal omsorg og inkludering

Fast samlingsplass

Sidan mottaket er heilt i etableringsfasen er enno ikkje alle rammene klare. Slik det ligg an då Grenda er innom, blir det faste opningstider på dagtid tre dagar i veka, og mogleg også på ettermiddagstid. Ynsket er å legga til rette for ein fast samlingsplass kor flyktningane kan få hjelp og rettleiing.

– Vi veit enno ikkje kva ressursar vi frå, eller kva behovet vil vera, men intensjonen er iallfall at dei skal ha nokon faste å ta kontakt med. I tillegg har Janne laga eit informasjonshefte med informasjon oversett til russisk og ukrainsk, som vi vil levera ut til dei som kjem. I dette får dei til dømes opplysningar om kor dei kan finne viktige tilbod og telefonnummer. Det er ein del generell informasjon, samt ein del lokalt, fortel Mathisen vidare.

Ein stor kabal som blir lagt

Det er eit stort arbeid som skal koordinerast gjennom mottaket. Dei som kjem skal få ein stad å bu, dei skal koplast opp mot ulike tenester, som til dømes helsetenester, og barnehage og skule. Likeins er det viktig å få flyktningane registrert, slik at dei får den hjelpa dei har rett på.

Det nasjonale ankomstsenteret for ukrainske asylsøkjarar er på Råde. For å avlaste dette senteret, er det også opna opp for å registrere seg regionalt, og for flyktningane som kjem til Kvinnherad skjer dette på Kokstad.

– Det er kjempeviktig at dei som kjem tek kontakt med oss, slik at vi kan kople dei på dei rette instansane. Registreringa er det som får ballen til å rulla, seier Anna Kathrine, før ho held fram:

– Det heile er ein stor kabal, og denne kabalen blir lagt både her og i kvar av einingane vi samarbeider med. Det er viktig å byggja ein god grunnmur, og det er dette vi held på med no. Eg føler absolutt at vi har oversikt, og trur vi skal klare å legge til rette for integrering. Men før integrering kjem inkludering – det er nøkkelen til at dørene opnar seg i eit samfunn.