Flying start på solokarriera
Dagen etter MGP-finalen hadde Grenda ein prat med Elsa Søllesvik. MGP-eventyret er kanskje over for denne gong, men for soloartisten Elsie Bay var dette berre byrjinga.
Publisert
Sist oppdatert
– Eg er veldig nøgd med kva me har fått til, sjølv om me sjølvsagt jobba for siger. Subwoolfer har ein fengande låt, og dei har også vore veldig gode på promotering. Maskorama er populært om dagen, og Nord-Norge er flinke å stemma, konkluderer ho, før ho held fram.
– Deltakinga i MGP har vore med å setje meg på kartet, og dette er jo berre starten på solo-prosjektet mitt. Eg er veldig glad for den posisjonen eg no er i, og eg har fått mange positive tilbakemeldingar frå folk som likar låta, og det er eg kjempe takksam for, seier ho nøgd.
Annonse
Takksam
På spørsmål om korleis ho opplevde heiagjengen på Gry Helges, er det berre takksemd å spora.
– Det er veldig rart å ha så mange som bryr seg, og som trør til, berre for meg. Det viser at eg har folk i ryggen sjølv om eg ikkje bur i Kvinnherad lenger. Det set eg utruleg stor pris på. Eg må også takka alle dei som har stemt på meg. Eg kom gjennom det første nålauga og enda i topp fire. Det viser at folk likar låta, noko som er eit føremon for at eg skal kunne halda på med musikken. Og det er jo dette eg ynskjer å driva med. Eg set enormt pris på det Merethe (Lillesand), Hilde (Enstad) og den gjengen har fått til på Husnes, så eg må berre sei tusen, tusen takk, seier Elsa engasjert.
I tillegg til heiagjengen i hennar tidlegare heimkommune, hadde ho også ein god heiagjeng med seg på Fornebu. Foreldra Anita Søllesvik og Oddgeir Søllesvik var på plass, saman med Thea Vaage (dotter til Hilde Enstad), onkel, Tommy Søllesvik, og tante, Hilde Solli, samt søskenbarna Isak og Jonas Søllesvik, alle frå Kvinnherad.
Annonse
– I tillegg var det to veninner frå Haugesund og VILDE, som var deltakar i tredje delfinale, var der òg, forklarar Elsa.
Sjølv om den intense MGP-jobbinga no er over, betyr ikkje det at Elsa tek ferie.
– I morgon skal mannskapet mitt samlast, og då skal me stake ut vegen vidare. Eg har ein del låtar som er klare, og no er det berre å satsa. Ein av dei første tinga som må på plass er å lage ein live-pakke, så eg satsar på at folk vil få høyre meir frå meg snart, sluttar ho.
