Flotte besøkstal for Fatlandskogen

– Det er kjekt at det er så mange folk som kjem hit, og det er plass til mange fleire i denne store skogen, fortel grunneigar Arne Gjerde.

Han har brukt ein kalkyle for å koma fram til besøkstalet, over det besøket dei ser dagleg og i dei travle periodane som til dømes påsken.

– Det var ein som lurte på om vi hadde telleapparat i skogen, men det har vi ikkje, ler Arne, og legg til;

– Vi får tilbakemeldingar på at folk set pris på det vi gjer her, og vi har alltid likt å driva med forskjellig, tiltak som folk har glede av. Det blir litt sjeldnare no når vi byrjar bli gamle, det minkar litt på kreftene. Men vi kan jo ikkje gje oss før vi ligg heilt flate.

Fyrste nyttårsdag vart Arne oppmerksam på at Gullhaug var med i «Fjelltoppjakten», ein app der ein kan jakta fjelltoppar og samla poeng.

– Vi såg allereie same dagen at det var folk på Gullhaug som ikkje pleidde vera der. Det viser seg at det er ganske mange som er med i fjelltoppjakta, og at dei har fått med seg den nye toppen allereie, fortel han.

Vesle Gullhaug, som ligg 80 meter over havet, gir 8 poeng i appen, så her kan ein hausta mange poeng i løpet av eit år.