Flott innsats i NM-kvalik

Laurdag og søndag vart det gjennomført kvalifisering til norgesmeisterskapen for unghundar, region vest. Staden var bakkane ved Avlsgarden i Rosendal, og arrangør var Kvinnherad sau og geit. Norsk Nursery, som konkurransen formelt heiter, er for hundar under tre år. 23 ekvipasjar frå Vestland fylke stilte til start. Tre av deltakarane høyrer heime i Kvinnherad; Ingebjørg Kjærevik, Ingri Helleland og Gunnar Henning Bakka.

Opplegget bestod av éin prøve laurdag og éin søndag. Resultata frå desse to vart lagt saman til slutt. Laurdagen gjekk veldig bra for Ingebjørg Kjærevik. Ho vart nemleg nummer 1 med Vip, og fekk 95 poeng av 110 moglege. Same poengsum hadde Sander Hindenes, men Ingebjørg vann på tid. Ho vart også nummer 5 med Kraft, som noterte 77 poeng. Gunnar Henning Bakka og Peg låg som nummer 15 med 39 poeng. Ingri Helleland og Poppy var uheldig og enda på delt sisteplass etter å ha blitt diskvalifisert.

Avanserte

– Det har gått veldig bra. Eg klarte å slumpa meg borti vinnarplassen i går.

I dag blir resultatlista snudd på hovudet, slik at dei nedste startar fyrst. Det dumme med å gjera det godt på den fyrste prøven, er at det blir lenge å venta, smilte Ingebjørg medan ho såg konkurrentane gjera seg ferdige på søndagen.

Tok seg til finalen i NM i gjetarhund-føring: - Veldig overraska!

På den andre prøven vart Ingebjørg og Vip nummer 2 med 96 poeng. Sidan Sander Hindenes, som har vunne NM tre gonger, greidde 97, enda det med 2. plass i samandraget for duoen frå Kvinnherad. Med Kraft vart Ingebjørg nummer 4, etter å ha sikra seg 85 på dag 2. Ingri Helleland og Poppy avanserte heilt til 12. plass i samandraget, etter sterke 85 poeng på søndag. Gunnar Henning Bakka repeterte 39 poeng, og enda dermed som nummer 19.

Kullsøsken

Ingri Helleland debuterte i konkurransen etter å ha sikra godkjenning helga før.

– Ho er ei «coming star», meinte Bjørn Helge Skåle i arrangørstaben.

– Eg fekk min fyrste hund i 2017, opplyste 29-åringen frå Omvikdalen.

Sjølv hadde ikkje Ingri så store forventingar på førehand. Men prøve 1 såg lenge veldig bra ut, heilt til Poppy gløymde seg ut og prøvde å bita etter sauene. Dagen etter gjekk alt så mykje betre.

– Unghundar er unghundar. Ein kan ikkje rekna med at dei går like godt kvar gong, trøysta Ingebjørg Kjærevik.

– Dei er lærlingar, konstaterte Ingri Helleland.

Artig nok er dei tre border colliane Vip, Kraft og Poppy alle kullsøsken.

Førebels er det ikkje kjent kven som går vidare til sjølve Norgesmeisterskapen. Finalen går av stabelen i Rogaland andre helga i november.