Flott førjulskonsert i Valen kyrkje: - Samspel i millionklasse

Førjulskonserten til Høyåker Musikkorps var verkeleg eit hyggeleg avbrekk i førjulsstria. Berre klokkespelet og bjøller i perkusjonsavdelinga fekk fram gleda og forventninga om at det snart er jul.

Repertoaret besto av ei rekkje kjente og kjære julesongar. Musikkorpset starta opp med ”Christmas Joy” og «Away In a Manger Traditional», der Jan Erik Dehli avslutta med ein flott solo på trompet, til stor applaus frå publikum.

Samspel i millionklasse

Under stødig leiing av sin faste dirigent Linas Dakinevicius, førte musikkkorpset publikum vidare inn i jula med «White Christmas», saman med Nils Trygve Markhus som vokalist.

Stødig var også kveldens konferansier, Ove Tvedt, som kom med både morosame og meir alvorlege historier mellom nummera. Han meinte blant anna at Høyåker Musikkorps burde byta namn til SIM, noko som fekk publikum til å både rikka på nesa og bryta ut i latter, før Tvedt kom med ei forklaring på utsegna.

– Med SIM meiner eg samspel i millionklasse.

Fin Harmoni

Nils Trygve si flotte stemme og musikkorpset møttest igjen i fin harmoni på «Nordnorsk julesalme», før dei unge, dyktige strykarane frå Kulturskulen entra scena og imponerte med «Gjøkvisa» og «Jeg gikk meg over sjø og land». Gruppa bestod av Tuva, Hanna, Aurora, Ada, Leon og Andreas, som vart leia og akkompagnert av Olena Pasichnyk. Som Ove Tvedt sa det så fint; dette er framtidas strykarar i Oslo strykeorkester.

Før kvelden var omme sytte Nils Trygve for ekstra julestemning med songen «O helga natt». Det heile vart avslutta med «Deilig er Jorden» og eit ståande og syngjande publikum, som tydeleg sette pris på hendinga. Alt i alt ein flott konsert som fekk fram julestemninga, som truleg vil sitja i kroppen gjennom heile høgtida.

I tillegg til vakre musikalske innslag, var det loddtrekning og utdeling av flotte gevinstar.