Flott dag med Gurine

– Me klatra heilt opp i masta, og så måtte me sleppa oss, og bli firt ned, seier Ingeborg Østvik Emmerhoff.

– Det var skummelt, utbryt Magnus Sjo Solstad.

Grenda får prata med ein gjeng blide niendeklassingar som nettopp har brukt skuledagen på båttur med Gurine i strålande solskin. Turen er ein del det lokale tilbodet frå den kulturelle skulesekken, ein avtale som interesselaget for Gurine inngjekk med Kvinnherad kommune i 2022. Alle niendeklassar i kommunen får ein tur med Gurine. Skipper Øystein Djupevåg er godt nøgd med dagen.

Viktig å få med nye generasjonar

– Dette var ein veldig kjekk gjeng å ha med på tur. Elevar er ofte litt usikre til å begynne med, men dei blir ivrige etter kvart, og syns det er kjekt. Og så ser me at dei blir meir samansveisa i løpet av dagen, hevdar Djupevåg.

Elevane takkar ivrig for turen når dei går i land. Det er tydeleg at dei har hatt det fint ilag med mannskapet denne dagen.

– Det er mange som bryt nokre barrierar i løpet av turen, både med å styra ein så stor båt, og å klatra i master sjølvsagt, fortel Djupevåg.

Dagens tur gjekk rundt nordenden av Halsnøy og til Valen, før dei køyrte tilbake. Men segla fekk ikkje koma opp. Dette er grunna tryggleiken, forklarar Anders Jordal, leiar for interesselaget.

– Me må køyra med motor når det er så mange om bord. Men me er veldig glade for denne avtalen me har med kommunen. Det er viktig for oss å dela Gurine med ein yngre generasjon. Her får dei læra lokal kulturhistorie, og ikkje minst får dei ei oppleving for livet, seier Jordal.

Ivrige ungdommar

– Eg fekk sitta på ei reila, og så blei eg heist opp, fortel Eirik Johan Eik Arnevik.

– Og så fekk me styra båten, og snakka i walkie talkie med dei som heldt utkikk, forklarar Erle Marie Vik.

– Me drog i tau, og lærte knutar, fortel Benedicte Kviteberg Emmerhoff

– Hólstikk, skyt Erle inn.

– Eg fiska!, seier Magnus Sjo Solstad. – Men eg fekk ikkje fisk då.

– Kjem de til å hugsa denne turen då?

– Ja!

– Resten av livet?

– Ja!