Fleirtal i levekårutvalet for skulenedlegging

Blant grepa som med det fekk fleirtal, er:

• Øyatun ungdomsskule vert lagt ned og elevane blir overførte til Husnes ungdomsskule når Husnes ungdomsskule er ferdig rehabilitert/utbygd, med målsetjing om ferdig bygg i 2026.

• Starta planlegging og prosjektering av ny barneskule på Husnes inneverande år. Skulen skal romma elevar frå Skarveland (5.-7. trinn), Valen (5.-7. trinn), Sunde, Undarheim og Bringedalsbygda skular. Mål om ferdig bygg i 2024.

• Starta planlegging av nybygg/rehabilitering av Valen skule som skal romma Skarveland (1.-4.) og Valen (1.- 4.). Mål om ferdig bygg i 2025.

• Sunde skule vert lagt ned når ny barneskule på Husnes står ferdig.

• Starta planlegging og prosjektering av ny barneskule i Rosendal i 2023. Elevar frå Uskedalen skule (5.-7.), Omvikdalen og Malmanger skule får tilbodet sitt ved skulen. Mål om ferdig bygg i 2026.

Sp foreslår nedlegging

Forslaget som fekk tre av sju røyster var sendt inn av Svein Åge Vangdal (Sp) sitt. Essensen av hans forslag var nedlegging av Sunde, Skarveland og Omvikdalen skular, men elles å behalda langt fleire av skulane som i dag.

Sp la fram forslag til ny struktur - opnar for å leggja ned fleire skular

I debatten i forkant av røystinga meldte det seg tidleg eit klart skilje i kva forslag representantane kom til å støtta.

Utvalsleiar Silje H. Olsen (SF), Nikolai Rørdal (Ap), Alf Jarle Langeland (KrF) og Kent Are Kjørsvik Petterson (V) gav alle uttrykk for å støtta kommunedirektøren sitt framlegg.

– Det er ei omfattande sak og mykje å vurdera. Me må ta ansvar, de er ei valdsam underbudsjettering i sektoren, og eg kjem til å gå for KD sitt forslag, kommenterte Olsen.

Langeland var bekymra for økonomien.

– Eg hadde håpa at forslaga som er kome inn hadde lege nærare kommunedirektøren sitt, sa han.

Skyttergraver

Nikolai Rørdal sa seg med utvalsleiar Olsen, og ein frustrert Petterson kom med ei retteleg breiside til dei siste tre representantane i møtet.

– Det er dessverre ikkje anna å venta frå Senterpartiet og Høgre. Skuledebatten har gått i minst 20 år, og erfaringa mi er at det alltid er nokre parti som ikkje er klare til å ta ansvaret når det må gjerast noko. Det ser dessverre ikkje ut som at ein får gjort noko denne gongen heller, fordi SP, H og Frp kjem til å gå saman og syta for det, klaga han.

Svein Åge Vangdal repliserte med ro i røysta:

– Sjå no litt på kva me legg fram før me går i dei vanlege skyttargravene våre. Me har i vårt forslag peika på ei utvikling. Eg trur med rette inngangen vil både Husnes-Sunde og Rosendal-Omvikdalen få noko som er betre enn det ein har no. Intensjonen vår er å laga gode einingar. Uansett får me ikkje gjort alt i løpet av første året, påpeika han.

Petterson roa seg litt etter det.

– SP-forslaget er det mest konstruktive forslaget som er kome derifrå i desse åra, så eg skal ikkje kutta hovudet heilt av dykk, men eg trur ikkje det er nok. Og eg måtte berre blåsa ut litt, så journalistane får litt å skriva om, repliserte han, mogelegvis med eit smil i munnvika.

Saka skal vidare til formannskapet og før endeleg avgjerd i kommunestyret i slutten av mai.