Fleire sjukemeldte grunna psykiske lidingar

Etter dei tre fyrste månadane av 2024 enda det legemeldte fråværet i Vestland på 6,2 prosent. Det er uendra frå same periode i fjor, og likt med gjennomsnittet for landet. Totalt utgjer fråværet over 1 million tapte dagsverk. Dette kjem fram i ei pressemelding.

– Dersom fråværet stabiliserer seg på eit høgare nivå enn før pandemien er det grunn til uro. Me ser at luftvegsplagar, som låg høgt i fleire år, no er nede på eit meir normalt nivå. Samstundes held auken med psykiske lidingar fram, seier fylkesdirektør i NAV Vestland Bjarte Hysing-Olsen i pressemeldinga.

Heng saman

Samanlikna med fyrste kvartal i fjor er det særleg lettare psykiske lidingar som fører til auke i sjukemeldingar, medan angst og depressive lidingar ligg ganske stabilt. Muskel- og skjelettplager er den viktigaste årsaka til sjukemelding, med nesten ein tredel av dei tapte årsverka.

– Me veit frå forsking at muskel- og skjelettplager og psykiske lidingar ofte heng saman, og at det eine lett fører til det andre. Difor er det så viktig å jobba førebyggjande med arbeidsmiljøet. Me har fagfolk som kan hjelpa, understrekar Hysing-Olsen.

– Eit positivt trekk er at nesten kvar fjerde sjukemelding er gradert. Det tyder på at mange arbeidsgjevarar legg til rette for at tilsette kan jobbe litt sjølv om dei har helseplager. Dette tener både den enkelte og samfunnet på, avsluttar Hysing-Olsen.