Fleire oppseiingar ved Rosendal Fjordhotel

Dette stadfestar tillitsvalt ved hotellet, som ikkje ynskjer namnet sitt i avisa, til Grenda.

– Eg kan bekrefte at det er fleire som har sagt opp.

– Er det noko særskilt grunn dette?

– Det at folk midt i livet og arbeidslivet seier opp viser jo til ei viss uro, seier den tillitsvalte.

Ein av dei som har hatt Rosendal Fjordhotel som arbeidsstad i fleire år fortel at ho vil levera si oppseiing i løpet av månaden.

– Vi er vaksne folk, og seier ikkje opp trygge og gode jobbar på løye. Vi gledde oss verkeleg til ein ny start, med nye leiing og nye eigarar, og var klare for at det ville bli endringar. Men no er vi fleire som har levert bekymringsmeldingar på dei tilsette sine vegne, og frå vårt synspunkt meiner vi at vi ikkje blir høyrt, seier ho, som heller ikkje ynskjer namnet sitt på trykk.

Grenda kjenner identiteten til den tilsette og til tillitsvalt. Stillingane som no blir ståande ledige er av dei med avdelingsansvar.

Stort konsern

Ole Kristian Johannessen, eigedomsdirektør i West Coast Invest, har ingen kommentar til dei nylege oppseiingane ved Rosendal Fjordhotel.

– Personalsaker er ikkje noko vi kommenterer til pressa. Slikt er omfatta av personvernet og forblir såleis i verksemda, seier han.

Vidare understrekar Johannessen at West Coast Invest er eit stort konsern der folk sluttar og byrjar heile tida, og dei er såleis vane med å handtere slikt.

– Dette er kvardagen for oss, seier han på generelt grunnlag.

Ikkje unaturleg med oppseiingar

Sjølv om Johannessen ikkje kommenterer personalsaker, peikar han på grunnar til at det no kan ha kome nokre oppseiingar.

– Det er gjerne ikkje så unaturleg at dette skjer no, då vi er inne i ei tid med nye eigarar, ny leiing og nye måtar å gjera ting på, funderer han.

Talet på oppseiingar var han ikkje kjend med, men vurderer Rosendal Fjordhotel til å vera greitt bemanna for sommaren.

– Så langt har vi ikkje fått noko indikasjonar på at det er store utfordringar med å få rekruttert nok folk. Vårt inntrykk er at situasjonen er relativt grei, sluttar han.

Rosendal Fjordhotel har om dagen fleire ledige stillingar utlyst føre sommaren.

Ingen kommentar

Hotellsjef Christian Lyngholm får spørsmål om oppseiingane, og om han kan bekrefta at leiinga har motteke bekymringsmeldingar.

– Vi uttalar oss sjølvsagt ikkje om personalsaker.

– Men på generelt grunnlag; Korleis handterer de bekymringsmeldingar?

– Det uttalar eg meg ikkje om, sluttar han.