Fleire månader med mange overliggjardøgn

I spørsmålsrunden i kommunestyret på torsdag, sa Silvia Tofte (H) at partiet hennar gjennom det siste året jamleg har blitt kontakta av pårørande. Bodskapen deira er at pasientar har blitt liggjande på overliggjardøgn på sjukehuset, samt at det er svært vanskeleg å få seng på Husnestunet fordi det ikkje er sirkulasjon på desse plassane.

– Korleis er institusjonskapasiteten i kommunen per i dag? spurde Tofte.

Ikkje vanleg

Kommunedirektør Leif Ove Mikkelsen hevda det er god flyt på dei såkalla «augeblikkeleg hjelp-sengene».

– Vi får flytta pasientar raskt over til korttidssenger når det skal skje og eventuell utskriving til heim om det er vurdert forsvarleg. I juli og august har det vore nokre få tilfelle der pasientar har lege opp til sju dagar i «augeblikkeleg hjelp-seng». Dette er ikkje vanleg. Det har òg vore døgn der «augeblikkeleg hjelp-seng», ikkje har vore i bruk, sa han.

Mikkelsen informerte at det er fleire og samansette årsaker til at pasientar ligg på overliggjardøgn.

– Pasientane er sjukare i dag enn tidlegare, dei blir tidlegare utskrivne frå sjukehuset, og blir ferdig behandla i korttidsopphald. Av den grunn kan det oppstå kapasitetsutfordringar, og pasientar blir lengre på sjukehus før dei får tildelt korttidsopphald i kommunen. Overliggjardøgn så langt i år skuldast også kapasitetsproblem i tenestene. Når kommunen ikkje har personell til å gje nødvendige og forsvarlege tenester i heimen eller på institusjon, må pasienten nokon gonger bli liggjande på overliggjardøgn på sjukehus til kommunen har fått på plass det som trengs for å ivareta pasientane, fortalde han.

Statistikken

Statistikken for 2024 viser følgjande overliggjardøgn: Januar 0, februar 2, mars 36, april 2, mai 1, juni 22, juli 12 og august 19.

Kapasiteten innan helse og omsorg vert rekna som tilfredsstillande og normal.