– Fleire grunnar for å pussa opp

Den planlagde oppussinga av kommunestyresalen i rådhuset handlar om meir enn å berre skifta bord og stolar.

Kommunedirektøren vil setja av 1 million til å oppgradera kommunestyresalen. Det punktet vil Frp i utgangspunktet fjerna.

– Vi meiner det ikkje er rett å gjera det no. Vi får heller sitja på dei dårlege stolane, sa Ove Lemicka då han la fram partiet sitt budsjettforslag.

Etter at Marit Årthun (KrF) sa seg samd med Frp i formannskapet, tok ordførar Hans Inge Myrvold (Sp) ordet for å understreka at både pultar og stolar er utrangerte. Han la til at opprustinga også handlar om moglegheita for å gjennomføra møte via tv-skjerm.

– Då er det viktig at dialogen og samhandlinga er god. Men i ei rekkje møte eg har delteke i, har det vore håplaust å driva effektivt, slo han fast. Myrvold la til at det også er viktig med skikkeleg audiovisuelt utstyr slik at innbyggjarane kan følgja dei politiske møta på ein god måte.

 

Vigsler

Ein annan grunn for å gjennomføra opprustinga, er rammene kring dei kommunale vigsleseremoniane.

– Vi treng ei ordentleg ramme for å gjennomføra vigslar. I dag har vi ikkje eit skikkeleg rom til slikt. Så dette handlar om veldig mykje meir enn stolar og bord, meinte Myrvold.

Også varaordførar Hilde Enstad (Ap) har gleda av å vigsla folk.

– Det hadde vore fint om vi hadde ein skikkeleg plass å gjera det. No er det litt stusseleg, støtta ho.

Ove Lemicka kom tydelegvis på gli under debatten, og opplyste at «dette er eit punkt på lista vår som vi absolutt kan forhandla om».