Fleire fekk store summar

Fjellhaugen Skisenter toppa lista med ei gåve på 904.000 kroner, som skal gå til prosjektet «Snø i lufta, snø på bakken».

– Vi skal kjøpa inn to nye snøkanonar slik at vi kan forlenga sesongen litt. Vi hadde ein relativt fortvilande sesong no med berre 6-7 opningsdagar, og det blir frustrerande både for oss og for dei som vil gå på ski, fortel styremedlem i Fjellhaugen Karin Thauland.

Med gåva frå Sparebank1-stiftinga kan skisenteret fullfinansiere to nye kanonar utanom monteringa.

– Vi er veldig takksame for gåva, og får mykje motivasjon til å gå vidare med arbeidet. Vi har jo to kanonar frå før, så alt av vatn og rør har vi allereie, då er det berre montering vi må finna ut av, fortel Thauland.

Ho fortel også at no som Kvinnherad Turlag fekk 663.000 kronar til å fiksa opp både sti og trasé opp til Fagnabu blir noko av arbeidet i Fjellhaugen lettare.

– Vi i Fjellhaugen skisenter har ansvar for å køyra opp stien dit. Det er eit par stadar det er litt vanskeleg å køyra maskina både på stien og skitraseén der vi køyrer løypa, no når det vart utbetra blir det enklare.

Ikkje sikringsskap

Odda og Ullensvang Turlag fekk og ei gjev gåva frå stiftinga. Med 750 000 kan dei no gå i gong med arbeidet for å få laga ei sikringsbu på Holmaskjer.

– Sikringsbu må ikkje forvekslast med sikringsskap, sa Gunnar Våge då han delte ut gåva til latter frå salen.

Ei sikringsbu vil rett og slett vera ei bu der dei besøkjande kan gjera av seg om det skulle oppstå brann eller andre ulukker i hytta på Holmaskjer.

– Det er eit tiltak for å auka tryggleiken for besøkjande i eit vêrhardt område. I naudstilfelle er det godt å ha ei reserveløysning når ein er så langt unna folk, fortel Håvard Reinsnos Apold i Odda og Ullensvang turlag.

Han fortel vidare at dei har søkt pengar hos fleire stiftingar, men vart mållaus av den store summen dei fekk måndag.

– Det er utruleg flott at vi kan få så store beløp, det er til stor hjelp for oss. Det er ikkje ein billig plass å bygga, då vi ikkje kan køyra opp med bil. Det blir fort helikopter og snøskuter vi må bruka, fortel han.

Sikringsbua er eit tiltak turlaget har hatt lyst til å få til i fleire år. I fjor fekk dei fart på seg og laga ei prosjektgruppe som jobbar med saken.

– Vi har fått sendt søknad til nasjonalparkstyret og fått eit vedtak der, og søkt om støtte frå fleire stiftingar. Det er vanskeleg å seie kva det vil koste, men eg tippar minst 3-4 millionar, fortel Apold og legg til;

– Med gåva frå Sparebank1-stiftinga Kvinnherad er vi godt i gang. No kan vi senda byggjesøknad til kommunen. Vi håpar på å få opp fundamentet i løpet av hausten.

Kulturminne

Også Rosendalstiftinga fekk et gledeleg overrasking måndag. Med 640.000 kronar kan dei for fullt starta arbeidet med å bevara historia om Lul Krag.

– Historia om denne flotte kunstnaren er gått heilt under radaren i Kvinnherad. I vår tid mottek vi veldige mengder kunstnerisk input, og kvalitetar frå vår eigen region kjem litt i bakgrunnen, sa Øystein Skaala då Rosendalstiftinga tok imot pengegåva.

Som Grenda har skrive fleire gonger før jobbar Øystein Skaala, Knut Sellevold, Jorun Larsen og fleire med å løfta fram Lul Krag.

– Vi vil visa ho fram til både noverande og framtidige generasjonar. Derfor skal vi no laga ein film i multimediaformat, der vi brukar både filmsnuttar, bilete, animasjonar, infografikk og det som måtte vera tilgjengeleg. Dette er eit forteljarformat som vi når langt med og som har lang levetid, fortalte Skaala.

Saman med dei flunkande nye medlemmane i Rosendalstiftinga, Sellevold og Larsen, kunne Skaala fortelja at med denne pengegåva kjem filmen til å vera ferdig allereie våren neste år.

I tillegg fekk Valedamene 382.000 kroner til nytt tak på bygdahuset på Valen.

Kvinnherad Skyttarlag fekk 592.000 til vedlikehald av skyttarhuset.

Ungdomslaget Hatlestrendingen fekk 530.000 til vedlikehald av ungdomshuset Samhald.

Kvinnherad Røde Kors Hjelpekorps fekk 600.000 til nytt tak på Røde Kors-huset.

Trio IL, Onsdagsgjengen fekk 350.000 til rehabilitering av tribune.

Matre IL fekk 190.000 til nærmiljøanlegg i Åkra.