Flatland blir ny direktør for Baroniet Rosendal: - Draumejobben
Anna Lena Flatland blir ny direktør for Baroniet Rosendal Rosendal/Den Weis Rosenkroneske stiftelse, melder Universitet i Oslo fredag ettermiddag.
– Eg har blitt tilbode draumejobben! Tenk å få jobba med utviklinga av den unike kulturskatten vi har i verdas vakraste heimbygd! Eg er audmjuk ovanfor oppgåva og tilliten som styret for Baroniet har vist meg, og eg er imponert over den utviklinga Baroniet har hatt under leiinga som no pensjonerer seg. Dette gler eg meg veldig til, seier Anna Lena Flatland.
Det kom inn 17 søkjarar til stillinga og styret for Baroniet Rosendal/Den Weis-Rosenkroneske Stiftelse vedtok 14. juni 2023 å tilsetja Anna Lena Flatland som direktør for Baroniet.
Artikkelen held fram under annonsen.
Flatland kjem frå stillinga som kultur- og idrettssjef i Moss kommune. Ho har tidlegare vore dagleg leiar for stiftelsen Akershus festning for kunst og kultur, samt leiar for program, kommunikasjon og marknadsføring ved Norsk folkemuseum. I tillegg har ho erfaring ulike kulturstillingar i fleire kommunar og frå mange prosjekt innan kunst og kultur, skriv Universitetet i Oslo i samband med tilsetjinga.
– Styret er svært glad for å kunne tilby Flatland stillinga. Ho har solid og relevant erfaring innanfor ansvarsområda til stillinga, og eit breitt nettverk innan kunst og kultur, uttalar styreleiar Arne Benjaminsen.
Flatland tiltrer etter nærare avtale i løpet av hausten 2023.
Noverande direktør Anne Grete Honerød har drive Baroniet i 43 år.
– Me vil takka Anne Grete Honerød og hennar mann Reidar Nedrebø for fantastisk innsats med å bygga og utvikla kulturminnet Baroniet til det unike kultur- og opplevingstilbodet det er i dag, kommenterer Benjaminsen.