Fjellferie i sommar? DNT har tips til ein trygg tur

– Å koma seg på fjellferie er slett ikkje vanskeleg, og med enkle grep kan du få ein tur som er både fantastisk flott og trygg. Det er ikkje mykje som skal til for å gjera fjellferien litt sikrare, slik at du verkeleg kan nyta turen til det fulle, seier generalsekretær i DNT Dag Terje Solvang i ei pressemelding.

Tilpass og pakk rett

– Tenk over turens lengde og vanskelegheitsgrad, og tilpass etter turfylgjet sin form og erfaring. Heldigvis har DNT turar for alle og einkvan, frå barnefamiliar og nybyrjarar til den mest erfarne som vil oppleva noko nytt, fortel Solvang.

Det er også viktig å veta litt om korleis ein pakkar sekken riktig. I fylgje Solvang bør du tilpassa pakkelista til turen og området du skal gå i. Han minnar om at det kan koma både snø, sludd og slaps også på sommaren, dersom ein er høgt nok oppe i fjellet.

– Vêret i fjellet kan endra seg raskt, og det er viktig å vera førebudd på uvêr. Vurder kor du skal og sjekk både vêr- og føremelding før du pakker sekken, uttalar generalsekretæren.

Solvang, som sjølv er glad i å gå på tur, rår folk til å kle seg i fleire lag, med ulltøy innerst for å halda varmen, samt eit lag som beskyttar mot vind og regn ytst.

– Også i sommarhalvåret er ull gull. På fjellet er det godt å ullvottar, ullsokkar og ei ekstra hue i sekken. Det er også lurt å ha med seg ein ullgenser eller ei tynn dunjakke, understrekar han.

– Og sjølv om ein bør vera førebudd, så bør ikkje sekken vega for mykje. Ein skal jo klara å bera han også, legg han til.

Fjellvettreglane

Solvang oppmodar også alle som skal på fjelltur til å gjera seg kjent med, og fylgja, dei ny fjellvettreglane:

1.Planlegg turen og meld frå kor du går

2.Tilpass turen etter evne og tilhøve

3.Ta hensyn til vêr- og skredvarsel

4.Ver førebudd på uvêr og kulde, sjølv på korte turar

5.Ta med nødvendig utstyr for å kunne hjelpa deg sjølv og andre

6.Ta trygge vegval og kjenn att skredfarleg terreng og usikker is

7.Vet alltid kor du er og bruk kart og kompass

8.Vend i tide, det er ingen skam å snu

9.Spar på kreftene, og søk ly om nødvendig

– Det er få ting som er betre enn å nyta sola i fjellandskapet. Eg ynskjer alle fjellfarar ein trygg og god sommartur, seier han avslutningvis.

Pakkeliste

Heilt til slutt kjem også DNT med ei nyttig pakkelista for dei som skal leggja ut på tur i sommar:

Kledning

•Regnklede (jakke og bukse)

•Tynn vindjakke og turbukse (med god fukttransport)

•Undertøy i ull/ullblanding + ekstra skift

•Sokkar med mykje ull og god passform + ekstra skift

•Ullgenser/jakke eller tynn dunjakke

•Ekstra hue

•Ullvottar eller andre vanter/vottar som er varme sjølv når dei er våte

•Lette innesko/inneklede

•Fjellstøvlar og gjerne gamasjar

•Shorts og t-skjorte (ull/kunstfiber) dersom det er meldt varmt vêr

Utstyr

•Ryggsekk med passe volum til innhald

•Vasstett pose som passar nedi sekken (ev. regntrekk utpå sekken)

•Lakenpose (ev. lett sovepose)

•Fyrstehjelpssaker med gnagsårplaster og sportsteip

•Toalettsaker (berre nødvendige) og eit lite/lett handklede

•Litt toalettpapir og ein ekstra bosspose

•Solbriller og solkrem

•Myggmiddel/myggnett

•Kart, kompass og kartmappe, evt. gps

•Multiverktøy + duct-tape

•Fyrstikker/lighter

•Lita hovudlykt/lommelykt

•Mat og drikke til turen

•Penger/kort

•DNT-nøkkel

•Proviant viss du skal besøke ubetente hytter