Fiskebæsjsjampofabrikken fekk andreplass

12-åringar i heile Vestland fylke har brukt sin kreativitet til å løysa kompliserte problemstillingar frå næringslivet.

– Av og til trengs det kreative 12-åringar for å tenka nytt når me vaksne har køyrt oss litt fast, sa Ingrid Kristoffersen frå Ungt Entreprenørskap då det nærma seg kåring av dei beste prosjekta i årets Smartare Teknologi denne veka.

Eit av dei prosjekta er forankra i Omvikdalen skule.

– Gruppa tenker utanfor boksen, dei er veldig kreative og det demonstrerer dei ved bruk av ein artig animasjon, sa jurymedlem Cathrine Fredhøi frå Webstep då dei tre beste forslaga vart premierte.

– Mykje læring

Lærar Tina Skår er naturleg nok stolt over at gruppa frå sjetteklasse ved Omvikdalen skule nådde så høgt opp i tevlinga med 15 andre skular.

– Det er veldig kjekt å sjå dei jobba som ei gruppe. Heile klassen har tatt eigarskap i prosjektet og vore med å vidareutvikla ideen etter at sjampofabrikken vann den lokale finalen. Elevane laga ein video av presentasjonen sin deira, redigerte filmen sjølv og sendte han inn, fortel Skår.

– Kva seier elevane?

– Dei var litt sjokkerte, såg eg. Dette var ikkje forventa hos dei, sjølv det alltid er nokon som meiner dei heller skulle vunne. Det er mykje læring i å vera med på slike tverrfaglege prosjekt som dette, og Ung Entreprenørskap har vore flinke til å losa skule og elevar inn i prosessen og prosjektet. Då er det også lettare å hoppa i det som lærar, seier Skår.

På premiesida vankar det både heidersteikn og søtsaker.

– Ungt entreprenørskap kjem på besøk til Omvikdalen ein av dei næraste skuledagane for å overlevera diplom og is til sjetteklasse, sluttar Skår.