Fire klassar har meldt seg på landets største miljødugnad for barn

I løpet av tre veker skal nærare 15.000 fjerdeklassingar frå heile landet konkurrera om å samla inn flest mogleg brukte batteri og levera dei til gjenvinning.

Måndag 12. april gjekk startskotet for Batterijakta 2021. Det er ein landsdekkande skulekonkurranse for 4. klasse, kor elevane lærar om gjenvinning, krinsløpstenking og korleis ein kan bli betre på å ta vare på jordas ressursar.

– Pandemien hindrar oss ikkje i å gjera ein innsats for miljøet. Barn er flinke til å finna løysingar, og vi gler oss til å sjå nye og spennande måtar å samla inn hushaldningsbatteri på, seier prosjektleiar Julie Vestgren Pettersen i Miljøagentene i ei pressemelding.

Kan vinna 30.000 kroner

Alle fjerdeklassingane er invitert til å delta på Batterijakta, som varer frå 12. april til 2. mai. I Kvinnherad har fire klassar meldt seg på miljødugnaden, og er med det med i kampen om å stikka av med hovudpremien på 30.000 kroner.

– I år er konkurransen tilpassa slik at den blir gjennomført på smittevernvenleg vis. Elevane blir ikkje oppmoda om å gå frå dør-til-dør, men å samla inn batteri på andre måtar. Klassane får også vekesoppdrag for å samla ekstra poeng. Desse kan løysast både heime og på skulen, står det å lesa i ei pressemelding.

I Kvinnherad er det 4A ved Omvikdalen skule, 4 ved Sunde oppvekstsenter og 4A og 4B ved Halsnøy skule som har meldt seg på årets batterijakt.