Fire arbeidarar på jobb i kraftverktunnelen då raset gjekk
Arbeidet med kraftverket Kroka 2 blir forseinka etter sørperaset fredag kveld. Inne i fjellhallen var fire mann på jobb då sørpa raste forbi.
Publisert
Sist oppdatert
– Dei var på den tryggaste plassen dei kunne vera, og blei der til me vurderte at det var trygt at dei kunne ta seg ned til hyttene dei bur i seinare på fredagaskvelden, fortel prosjektleiar for bygginga av Kroka 2 Oddbjørn Kroka til Grenda.
– Me hadde dialog om at dei skulle halda seg inne før raset også. Då det gjekk merka dei det inne i fjellhallen på buldring og bråk, og at straumen gjekk. Etterpå varsla dei oss, og så varsla me politiet om at det var fire mann inne i tunnelen.
Annonse
Bilete politiet offentleggjorde frå raset fredag kveld viser at sørpeskredet har følgt nedover elveløpet. På vegen ned mot fjorden sopte det med seg ein gravemaskin og ein varebil.
– Det er entreprenøren sine ting som er tatt. Det er litt materielle skadar, så det går kanskje to veker før me er på plass med full tunneldriving igjen. Det ligg litt stein og snø i inntaket til Kroka1-kraftverket også, som me held stengt til det blir reinska og rydda. Eg trur det går ei lita veke før det kraftverket produserer straum igjen.
Då Grenda snakka med Kroka hadde det vore geolog og sjekka fjellsida frå helikopter.
– Viss vegen blir rydda og opna i dag, så byrjar nok me å ausa vekk snøen i morgon, slik at me kan ta opp att arbeidet. Prosjektet fekk naturlegvis gjort ein skredfarerapport av Norconsult før ein starta, og den er følgt, understrekar Kroka på telefon frå rasstaden.
