Fint lenge – men dårleg innspurt

Nedbørstoppen blir igjen toppa av Matre. Sjølv om 276,8 millimeter ikkje er sjokkerande mykje regn der i garden, er det likevel nok til å trona suverent øvst på novemberlista. På sølvplass kom Ølve med 238,5 mm, medan bronsen gjekk til Omvikdalen, som noterte seg for 224. Desse var dei einaste bygdene som tok i mot meir enn 200 millimeter med regn og snø.

Minst nedbør var det sjølvsagt Sæbøvik som registrerte. Der fann dei ut at 90,5 millimeter fekk halda. Vang i Rosendal godtok å passera 100-grensa så vidt, medan Valen strekte seg til 127,6 millimeter.

Temmeleg ufyseleg

Alle tala er vesentleg høgare enn tilsvarande månad i fjor. Det påverkar naturleg nok også totalen etter 11 månader, der 2024 no kan «skryta» over å vera litt våtare enn 2023, rett nok berre så vidt. Det finst til og med eit unnatak frå regelen; nemleg i Mauranger. Der er no fjoråret akkurat 1 millimeter våtare enn i år.

Talet nedbørsfrie døger i november var for så vidt ikkje så verst, med unnatak av Eik i Rosendal. Der var det berre 8 døger utan regn. Alle andre bygder noterte frå 12 til 15 slike dagar. Underlagsmaterialet viser at november eigentleg baud på ganske godt vêr til og med den 24. Deretter slo det om. Vi hugsar mellom anna at den siste helga var temmeleg ufyseleg.

Historisk sett har 2006 den våtaste november-månaden. Då falt det så mykje som 422,6 millimeter på Husnes. Fullstendig motsett var det i 2019, då målebegeret berre samla opp 12,4 mm.

Kaldt

Temperaturane bevega seg eit godt stykke ned på minussida. I fem-seks dagar på rad frå den 18. var det kuldegrader. Fleire av dagane hadde også minus i snittet denne perioden. Kaldast var det i Mauranger. I Sunndal kraup gradstokken ned til 7,7 kuldegrader den 22. Men temperaturen var til gjengjeld ganske høg på det varmaste. I Rosendal passerte ein 14 pluss den 15. Snitt-temperaturen hittil i år er på 9,6 grader, målt på Korsneset.

«På landsbasis var temperaturen 1 grad over normalen, noko som gjer november 2024 til ein av dei 30 varmaste novembermånadene sidan målingane starta i 1901», opplyser Meteorologisk institutt.

Målestasjonar

Oversikten viser noteringane til følgjande målestasjonar: Ølve (Henrik Barthel), Hatlestrand (Gunn-Bente Stølen), Mauranger (Tore Bondhus), Rosendal - Eik (Jan Eik), Rosendal - Vang (Kvinnherad Elektro), Omvikdalen (Birgit Mørkve Hjelmeland), Matre (SKL), Uskedalen (Kurt Haugland), Husnes (Hydro), Valen (Jarle Håvik) og Sæbøvik (Harald Særsten).

Snitt-temperatur totalt pr. november:

2024: 9,6

2023: 9,14

2022: 9,83

2021: 9,25

2020: 9,74

2019: 9,15

2018: 9,59

2017: 9,7

2016: 9,02

2015: 9,3

2014: 10,9

2013: 8,4

Kjelde: Kurt Haugland, Uskedalen