Feststund for fårefamilien

I ridehallen i Rosendal var 54 lam samla for få både eksteriør og det ein kunne sjå av interiør streng vurdert av dommarane. Åshild Irene Lie, Cecilie Tønnesen-Vestbø og Tiril Storm Gravelsæter dømde med mynde, og med ryggdekning i Norsk Sau og Geit.

Av 54 dyr i år blei 42 blei kåra, inkludert to lam på dispensasjon.

Færre enn i fjor

– Det er litt færre lam i år, og det er litt skuffande. Me hadde 78 dyr utstilte i fjor, seier Karl Ingve Eide, leiar i Kvinnherad Sau og Geit.

Han oppmodar sauebøndene i kommunen til å stilla igjen til neste år.

– Det har vore ein dårleg sommar før sauebøndene, noko som merkast igjen på fleire område. Og det kan vera folk stiller for høge krav til seg sjølv, og av den grunn ikkje stiller på kåringssjået, analyserer Eide.

Han tykkjer kåringssjået er ei triveleg stund for både store og små, enten dei er saueeigarar eller ikkje.

– Det ein happening me ser fram til. Dette er sosialt, og mange familiar som kjem tilbake år etter år. Me set pris på alle som kjem, også utover dei som har lam på kåring, seier Eide.

Cheviot og svartfjes

Søndag hadde halsnøybuen sju lam med i kåringa. Tidleg på dagen hadde han annonsert trekking av lodd klokka 1330, og sidan ingen halsnøybuar med respekt for seg sjølv tullar med basartradisjon, var det ikkje rom for slinger i valsen når tida var der.

Då fekk det ikkje hjelpa at trekkinga fall samtidig med at Eide sine eigne lam skulle under lupa – bokstaveleg tala – til dommarane. Men dei som hevdar at han var ørlite distrahert undervegs, kan ha litt rett.

Når han ikkje var opptatt med basar, kunne Karl Ingve også fortelja at han er litt uroa over rekrutteringa til sauebøndene.

– Ein skal vera obs på at ho ikkje er som ho burde. Eg trur det vil merkast på tilvekst og attgroing, og eg trur det er færre sauer i Kvinnherad om 10-15 år om ein ikkje får gjort noko på rekrutteringssida, spår Eide.

Rett nok har talet på sauebønder i Kvinnherad har gått opp med sju frå 2022 til 2023. Totalt var det 1. mars i år 169 ulike bruk som har sau, der flokken varierer frå 3 til 228 vaksne sauer.

– Totalt var det 8108 sauer i Kvinnherad pr. 1. mars, altså lamminga tok til, opplyser Kjetil Mehl ved landbrukskontoret til Kvinnherad kommune.

Det var fint spenn i lamma som vart kåra også. Blant lamma var ein svartfjes, i følgje somme den første som er kåra nokon gong, i alle fall første på lang tid. Det var også cheviot-lam, tilhøyrande Avlsgarden som vart kåra, med sløyfe. Mest var det likevel av spælsau.