Feststemning i Husnes kyrkje

Jubileumsgudstenesta i Husnes Kyrkje baud på både flott musikk, ny bok, nattverd og ord frå mange prestar – både prestar i Kvinnherad-kyrkja i dag, og prestar som tidlegare har arbeidd i Husnes og Holmedal sokn. Sjølve preika var det prost Svein Arne Theodorsen som stod for.

Klokkar Liv Slettemark ynskte varmt velkomen, før ein heil prosesjon av prestar kom opp kyrkjegolvet. Det var sokneprest Åse Selsvold som tok ordet først.

– I 150 år har lysa blitt tent i denne kyrkja, både for lyse og tunge stunder, reflekterte ho, og heldt fram:

– Kyrkjerommet er ein plass for dei lange tankane, anten dei går framover eller bakover i tid. Og kyrkjerommet er til for alle!

Imponerande debut

Kvinnherad har fått sitt eige gospelkor, og dei hadde sin konsertdebut i jubileumsgudstenesta. Og det var litt av ein debut. Sjølv om koret er nyoppstarta, høyrtest dei ut som dei hadde sunge saman i årevis. Med sine tolkingar av «Get Together» og «Glory Glory», steig stemninga i kyrkja, og dei fekk stor applaus.

– Det er veldig kjekt om fleire vil vera med i koret vårt, sa dirigent Tone Reinertsen Hellesøy før det siste nummeret.

Prost Svein Arne Theodorsen brukte tid i si preik til å takka nemnda som organiserer heile jubileumsfeiringa, og særleg at det har blitt gitt ut ei heilt ny bok i høve jubilea til Husnes og Eid kyrkjer, «To kyrkjer, éi tru» av Lars Jostein Røyrvik.

– Eg ser at ordføraren er her i dag, og eg reknar sjølvsagt med han kjem til å vera i Eid kyrkje neste sundag óg, oppfordra han, til humring frå kyrkjerommet.

Talte for siste gong i Husneskyrkja

Theodorsen stilte også eit ope spørsmål om kva me vil kyrkja skal vera i dag, og rosa både musikken i kyrkja, og arbeidet som blir gjort innan trusopplæring og kontakt ut i samfunnet.

- Kyrkja er for oss, kyrkja er for fellesskapen mellom oss, sa han.

Dette var faktisk Theodorsen si siste gjerning i Husnes kyrkje som prost i Sunnhordland. Han går av med pensjon i haust, noko kyrkjeverje Torstein Aarthun minte kyrkjelyden på, då han i ei helsing takka prosten for lang og god teneste i vel 20 år.

Dei andre tidlegare prestane, Jan Ove Totland og Rune Engedal fekk også ordet. Dei fortalte litt om tida si i soknet, og nytta høvet til å takka sokneråda for arbeidet med feiringa. I tillegg var det nokon i kyrkjelyden som reiste seg og fortalte om kor mykje kyrkja har betydd for deira liv og familie.

Dagen vart avslutta med kyrkjekaffi. Då hadde Grenda reist vidare på nye oppdrag, men me høyrer rykte om ei spesielt god sjokoladekake.