Festkveld for lagslivet: – Det gjekk over all forventning
Fredag inviterte Kvinnherad frivilligsentral alle frivillige lag og organisasjonar til dialogkonferanse og festkveld i Festsalen. - Det at det kom så mange, når ein veit at dei frivillige har det travelt nok frå før, var fantastisk kjekt, seier ei glad Veronica T. Thorsen i Kvinnherad frivilligsentral.
Publisert
Fredag var det duka for både motivasjonsføredrag med Øystein «Pølsa» Pettersen og dialogkonferanse, alt i regi av Kvinnherad frivilligsentral. Veronica T. Thorsen i Kvinnherad frivilligsentral kan i ettertid fortelja om ein svært vellukka kveld.
– Det gjekk over all forventning, og me er svært nøgd med gjennomføringa og glade for alle som tok turen denne kvelden. Me har fått mange gode tilbakemeldingar om at me traff med opplegget. Øystein er jo ein fantastisk mann, med eit stort engasjement, seier Veronica oppglødd.
Annonse
Etter føredraget forflytta festen seg til Festsalen. Øystein Pettersen gjekk frå å vera føredragshaldar til konferansier på dialogkonferansen og festkvelden for 55 av kommunens frivillige. Ein konferanse som fekk fram den gode samtalen.
– Det at det kom så mange, når ein veit at dei frivillige har det travelt nok frå før, var fantastisk kjekt. Nokon av dei har i tillegg på seg tre-fire hattar og er frivillig i fleire lag og organisasjonar. Det var mange gode diskusjonar denne kvelden, og me fekk inn ein heil haug med gode innspel til frivilligplanen, fortel ho.
Ynskjer lokale og kontaktperson
På stolane sat også ordførar, politikarar, delar av administrasjonen i kommunen, einingsleiarar og representantar frå forskjellige råd, for å nemna nokre.
Annonse
Er det nokon av innspela som går igjen?
– Ja, absolutt. Noko av det som går igjen er at frivillige lag og organisasjonar treng lokale å vera i. Dette er noko kommunen bør leggja til rette for. Per i dag kan ein jo leiga lokale, medan barn og unge kan låne. I tillegg ynskjer dei frivillige ein kontaktperson som dei kan ringa til å få veiledning og slikt. Innspela frå denne kvelden tar me med oss vidare i prosessen, planen skal jo trass alt gjenspegle frivilligheita i kommunen, seier Thorsen.
Elles fekk dei 55 frivillige som tok del i workshopen servert tapas og marimbakonsert frå kulturskule-elevar.
Grunnen for ein frivilligplan, som skal vera ein del av samfunnsplanen til Kvinnherad kommune, er å få ein heilskapleg plan for oppfølging av og samarbeid med frivilligheita i Kvinnherad kommune. Den skal mellom anna peika på korleis kommunen bør agera for å leggja best mogleg til rette for frivillige lag og organisasjonar.
