Festivalsjef Una Kolle (i midten) meiner dei ligg i rute til å laga tidenes festival på Dønhaugjordet i Uskedalen til helga. Her med festivalsjef nummer to, Margit Lund-Mikkelson og bookingansvarleg Daidalos Dahle. (Arkivfoto)

Festidalen: – Satsar på tropisk stemning

Det er tysdag ettermiddag, og det som blir kalla tidenes festival nærmar seg med stormskritt. Festivalsjef Una Kolle sjekkar yr nok ein gong.

Jorun Larsen
Publisert Sist oppdatert

– Det ser faktisk ikkje så verst ut no. Varmt og nokre dropar utpå kvelden, me får satse på tropisk stemning på jordet. Litt byer må me tola, seier ho optimistisk.

Men vêret er den eine tingen dei uansett ikkje kan gjera noko med. Dei andre sakene jobbar dei enno med å få på plass. Og nemnde naturelement har ført til at dei er ørlite forseinka med arbeidet på jordet i Uskedalen.

Vind og regn i helga som var sette kjeppar i hjula for den opphavlege planen om å ha god tid.

– Denne veka er det difor litt hektisk, sidan me ligg litt bak skjema. Men i kveld er det full rulle på jordet, og i morgon blir det scenerigg og frivilligsamling, i tillegg til at festivalkontoret opnar, forklarar Kolle.

Festidalen 2022: Det er full rulle i Uskedalen denne veka. Klokka 09 onsdag morgon byrja sceneriggen. – Me er tolv stykke her i dag, og me er i rute, kunne Jakob Vik frå Konsertsystemer melda om. Han er rigg-leiar på Dønhaug.

Billett for armband

Samstundes nyttar ho høvet til å oppmoda folk om å ta turen til festivalkontoret. Det vil nemleg letta trykket på køen og på dei frivillige som skal sjekka billettar.

– Festivalkontoret er ope onsdag, torsdag, fredag og laurdag. Jo fleire som går dit for å byta billettane sine inn i armband, jo mindre kø får me ved inngangen. I tillegg har me ein del merch der, så dei som vil sikra seg ein genser eller sydvest kan skaffa seg dette der.

Men i hovudsak er det ikkje Festidalen-merch dei aller helst ønskjer å kvitta seg med, men siste rest av billettar. Det er enno nokre att av dei 3000 som har vore tilgjengelege, og det siste dei vil er å avvise folk i porten fordi det er fullt.

– Dei som vil på Festidalen bør kjøpa billett no, for eit slikt billettsal som me har hatt i år har me aldri før opplevd. Det er heilt formidabelt. Men det er keisamt å måtte avvise folk fordi det er fullt, så her må ein vera ute i god tid, seier ho, når det er fire dagar att til det brakar laus på Dønhaugjordet.

Sylvia (10) og Håkon (8) Eide Myklebust var med på hesjedugnaden på Dønhaug på tysdag kveld. No nærmar det meste seg klart på uteområdet.
Isabell Stensletten og Karoline Neset har fått på plass festivalkontoret i gamleskulen nede i sentrum. – Det er viktig å understreka at det er personleg oppmøte for dei som skal byta billett mot armband. Dei må altså koma hit sjølv. Men det er verkeleg å anbefala altså, for då kan dei berre visa armbandet sitt i porten og gå rett forbi køen, smiler dei.

Framleis behov for frivillige

Ho meiner at billettsalet tyder på at publikum er klare for fest etter gamalt. Og det er gjengen som skipar i stand «tidenes festival» òg.

– Det er jo tre år sidan sist. Så noko sit i fingrane, medan anna er litt meir rustent. Men me er iallfall utruleg klare for å laga festival!

– Den siste tida har det kome fram at frivilligpoolen kunne vore hakket større. Er de i mål med frivillige no?

– Me er nesten i hamn, men framleis skulle me hatt nokre fleire til laurdagen. Altså me søv godt om nettene, men me kunne ha sove enno betre. Eg håpar ikkje me framleis manglar folk når fredagen kjem, medgir ho.

Med dette kjem Kolle inn på hovudbodskap nummer to: Kunne du tenka deg å vera frivillig og hjelpa til med å laga tidenes festival i Uskedalen, er det berre å melda seg til dyst. Behovet er der framleis.

Ja, det blir burger

Til sist informerer ho om at alt av praktisk informasjon no ligg på Festidalen sine nettstader, der ein kan sjå kor og kva tid bussane går på kvelden, overnattingsmoglegheiter, opningstider på festivalkontoret med meir.

– Men kva med maten då?

Una ler.

– Spørsmålet me har blitt spurt flest gonger sidan det blei klart at det faktisk vart festival er: «Blir det burger?» Og ja, det blir burger. Det er Tommy i Bra Lunsj som skal stå for maten, så det trur me blir veldig bra, sluttar ho.

Flittige frivillige og Festidalen-styret jobbar i desse dagar iherdig for å skapa tidenes festival. Christine Skjolddal Ormehaug og Elisabeth Skjolddal kjem med godt arbeidsmot heile vegen frå Samnanger. Søstrene sjekka inn på festivalcampen i helga som var, og har jobba i kulissane sidan dei kom. – Det er grådig kjekt å komma inn her og vera med og bli kjent med folk, sa søstrene som i år trælar for Festidalen på 3. og 2. året.
Gardseigar Magne Huglen (f.v.) svirrar som ein maur blant dei andre då Grenda dinglar innom Dønhaug. Her i logistikkprat av eit eller anna slag med Steinar Haugland. Sjølv om det enno manglar nokre frivillige, har Haugland også godt nytt å melda. – Me har faktisk klart å rekruttera ein god del ungdommar i år, noko som er veldig kjekt, sa han.
uskedalen kultur og underhaldning fritid festivalar festidalen musikk nyhende
Powered by Labrador CMS