Festidalen med eventyrleg billettsal – og skrikande behov for frivillige

– Dette er litt todelt. Gladsaken er at me aldri har opplevd eit liknande billettsal nokon gong. No ser me vel ut som at me er på 1500 inne kvar av dagane. Dette er nivået me har vore på seint fredag kveld, på opningsdagen, fortel Festidalen-trioen Margit Lund-Mikkelson, Una Kolle og Daidalos Dahle.

Vil ikkje gå på komprimiss

Tidlegare år har arrangørane sett strek på 2700 publikummarar, av omsyn til kapasitet hos organisasjonen og dei frivillige. I år var tanken å opna til 3000, noko som vil vera rekord for Festidalen.

– Me har dimensjonert for det, men me har ikkje klart å få til frivilligrekrutteringa i år. Me manglar så mykje folk til å gjennomføra festivalen at me ikkje kan ha det talet inne her. Me kan bli nøydde til å stoppa billettsalet snart om ikkje me får ei løysing på frivilligbiten, kommenterer Una Kolle.

Daidalos Dahle forklarer kvifor det er slik.

– Ein kan ikkje gå på kompromiss med tryggleik og komfort. Folk skal sleppa å stå i kø heile kvelden. Det skal vera kjekt for publikum, og også for dei som jobbar frivillig, seier han.

No manglar dei rundt 100 totalt, fordelt på halvt om halvt for kvar av dagane.

– Me er godt dekka i maten og baren, men det er i hovudsak vakthald, på campen, i rigging og inngangsdelen. Nokre av desse jobbane kan gjerast i forkant og etterkant, slik at ein får med seg heile festivalen, lokkar dei.

Standardtilbodet frå Festidalen er at éin dag som frivillig er lik billett til den andre dagen. Hovudkvalifikasjonen er at ein er over 18 år. Vakthald krev truleg at du er over 20.

– Me leiger jo litt profesjonelt vakthald, og dei får hovudansvaret for dette. Me kjem i år til å dobla det vakthaldet i forhold til tidlegare år, seier Dahle.

– Me liker betre å kalla det dei frivillige skal gjera som vertskap, og syns det er eit meir dekkande omgrep, supplerer Kolle og Lund-Mikkelseon.

– Det er jo utruleg gøy at det går så bra! Me må bruka ein del energi no på å motivera folk til å bli frivillige, og det er ein stressfaktor for styret, vedgår dei.

Under press

Frivilligarbeidet er under press, konstaterer festivalleiinga, og refererer til andre festivalar som har møtt tilsvarande utfordring som Festidalen.

– Veldig mange har mista ein base med frivillige, men det er også eit kjedeleg faktum at i løpet av to år med pandemi så har mange som har vore i festivalbransjen måtta finna seg anna arbeid. Dermed får me ikkje tak i produksjonsansvarlege eller taxisjåførar slik ein gjorde for tre år sidan. Mange har måtta finna seg nye jobbar i pandemitida. Og så er dette sommaren då alle skal ta igjen alt ein forsaka dei føregåande åra, oppsummerer Dahle.

Alle ledda rundt oss som har gått gjennom endringar i desse åra, og det merkar

Trioen ser likevel optimistisk på å gjennomføra ein aldeles strålande festival.

– Det einaste ein manglar no er at 100 personar til melder seg som frivillige. Ikkje at eg har lyst å krisemaksimera, seier Una Kolle, men vedgår likevel at det er såpass kritisk at Festidalen-leiinga kallar inn til ein pressekonferanse to veker før festivalen startar.

– Ein har alltid mangla nokon frivillige heilt til siste slutt, men når det talet har vore ti, så har du klarer du å finna dei sjølv. Når det er snakk om 100 treng me meir hjelp, sluttar Kolle og vonar sterkt at frivillig-Kvinnherad strekkjer ut ei hjelpande hand.

Og kjenner du at du ynskjer å bidra til årets Festidalen, så får du kontakt med dei gjennom dei fleste sosiale media.