Fest og basar
Alle gode ting er tre, og fredag kveld vart det dermed endeleg klart for Valedamene sin etterlengta basar. Festen vart opna med ei gladmelding; dei er løyva millionstønad frå Fjelberg Kraftlag Stiftinga.
Publisert
Sist oppdatert
Like før arrangementet braka laus meldte Veronica Thorkildsen Thorsen om 160 selde billettar og heile 70.000 kroner i førehandssal.
– Valedamene er evig takksame for næringslivet og dei lokale butikkane som har sponsa oss med flotte premiar, sa ho på vegne av foreininga.
Annonse
Ho meinte at ein av grunnane til at basaren får så god oppslutnad, både av næringslivet og av innbyggjarane er at inntekta kjem alle til gode. Pengane som vert samla inn på basaren skal gå til å realisere planane som Valedamene har for Eskelandsstranda, og prosjektet er ganske langt på veg.
Då arrangøren sjølv stod på scena for å takke og informere om dei økonomiske utfordringane med å oppruste bygdehuset før åresalet tok til, kunne dei nemleg fortelja ei gledeleg nyheit.
2.370.000 kroner å rutta med
– Vi tøffa oss til og søkte om 3 millionar frå Fjelberg Kraftlag Stiftinga, og utfordra dei på å tøffe seg med å støtte oss. Og vi har fått tildelt 2.370.000 kroner. Så no treng vi meir, strålte Siri Rusten frå talarstolen, til stormande jubel frå salen.
Annonse
Valedamene har ikkje fått tildelingsbrev enno, men meldinga er overrekt muntleg. Veronica vart oppringt av Sverre Olav Handeland, som bad ho om å setje seg ned for ein huggeleg beskjed:
– Han sa då at F.K. stiftinga ville gi 2.370.000 kroner, der 500.000 skulle gå til opprusting av Eskelandsstranda og resten til arbeid med huset!
Dermed ligg det an til å bli orden både ved fjorden og i bygdehuset framover.
Med 2000 årer liggjande i signaturnetta til arrangøren var det duka for ein sokalla rasjoneringsbasar, kor dei oppmøtte fekk kjøpe ti årer kvar. Dei resterande skulle bli auksjonert bort til sist, til det kveldens konferansier, Peder Sjo Slettebø, presenterte som «ein god pris».
Slepp damene til
For dei som ikkje hugsa kven han var, minna han på kor han kom i frå, og peika med det på den verkelege grunnen til at han var blitt spurt om å leia kvelden.
Annonse
– Eg er jo frå Halsnøy, og der har me sterke basartradisjonar, fekk han sagt før salen braut ut i ellevill jubel.
Då hadde han allereie jazza stemninga opp med eitt og hitt, mellom anna med å påpeike dei positive konsekvensane med å sleppe kvinnene til, eksempelvis Valedamene, noko som også hausta applaus frå publikum.
– Me har våga å sleppa damene til, og eg vil sei at det har gått bra. Skål for kvinnene og for moderne likestilling generelt, sa han, og så publikum gjorde.
Valedamene hadde også ein liten filmpremiere på lur før årene vart spreidd til den optimistiske hop. Filmen viste korleis tankane for Eskelandsstranda er, og dersom alt går etter planen vil det mellom anna koma på plass badstu til sommaren.
Filmen skal spreiast på sosiale medier, og gjennom den kan ein få eit innblikk i det sosiale prosjektet Valedamene jobbar mot å realisere, mellom anna ved å invitere til basar.
