Ferjegalskap og kulturarv
I boka «Ferjefolket» får lesaren mellom anna eit kapittel om Viggo Nonås, kaptein på ferja Lærdal som går Årsnes-Varaldsøy-Gjermundshamn.
Halvor Folgerø har tidlegare hatt suksess med bøkene om Vestlandsvegar. No kjem det fleire samferdslebaserte historier frå forfattaren. Folgerø har intervjua mange menneske med minne og historier frå ferjene på Vestlandet. Samlaget skriv i ei pressemelding:
– Her er historier om fødsel, fest og forlis – og eit overraskingsbryllaup på ferja. Vi møter sjåføren frå Vinmonopolet som mista polvarer til éin million kroner i Bjørnafjorden då han gløymde å setja på handbremsen – så folk stimla rundt ferja for å fiske etter brennevinsvarer.
Annonse
Også meir alvorlege hendingar har fått plass i boka, og eit kapittel er tileigna den tragiske Hatvik-ulukka i 1995.
Heimkomsten til «Folgefonn»
Den fulle tittelen på boka er «Ferjefolket. Storm og stille, fest og fødslar, kjærleik og kø». Ein av dei som har opplevd kjærleik på ferja, er Viggo Nonås, som jobbar på ferja «Lærdal». I kapittelet «Ferjegalskap» får lesaren eit portrett av Nonås. Kapteinen samlar på alt som har med HSD å gjera.
– Om ferjegalskap var ein diagnose, hadde Viggo for lengst vore innlagd, skriv Halvor Folgerø i boka.
Annonse
Kapitelet handlar også om korleis Nonås har arbeida for å henta heim den gamle ferja «Folgefonn», som gjekk i Sunnhordland frå 1957 til 1979.
– Ferjefolket løftar fram ein del av den vestlandske kulturarven som enno lever langs kysten, skriv Samlaget i pressemeldinga.
