Ferjeforslaget: – Skal vera forsiktige med å ikkje ta dette på alvor

Kåre Martin Kleppe frå Tysnes var blant dei som sat i salen på onsdag då fylkespolitikarane fekk høyra om korleis fylkesdirektøren har tenkt å spara pengar. Konkret meiner sistnemnde at det er nødvendig å spara inn 131 millionar kroner berre i kollektivsektoren. Tilrådinga om å kutta eine ferje både på Ranavik-Skjersholmane og Gjermundshamn-Varaldsøy-Årsnes kom brått på.

Sjokkforslag: Føreslår å ta bort ei ferje frå både Årsnes og Ranavik

– Vi fekk sjå ei lang liste over tiltak for å dekka inn millionane som manglar innan kollektivtransporten, både kuttforslag og prisauke. Vi har jo fått høyra tidlegare at fylkeskommunen manglar ein del pengar, men eg vart svært overraska over forslaget som omfatta ferjene i Kvinnherad. Å leggja ned sambandet Kinsarvik-Utne vart føreslege også i fjor, så eg forventa at det ville koma igjen, medan forslaget om Kvinnherad ikkje har vore oppe før, fortel han til Grenda.

Vedum og Sande

Mange trur kanskje at utspelet frå fylkesdirektøren er sabelrasling for å leggja press på regjeringa og fylkespolitikarane. Kåre Martin Kleppe fryktar det ikkje er så enkelt.

– Eg trur vi skal vera forsiktige med å ikkje ta på alvor den økonomiske situasjonen til fylkeskommunen. Det ville vore høgt spel å rasla med sablane for å leggja press på regjeringa, det er heller ikkje fylkesdirektøren sin jobb. Men eg håpar at forslaget hans gjer at Trygve Slagsvold Vedum og kommunalminister Erling Sande vaknar litt opp, og ser at situasjonen er svært alvorleg, seier han.

Ferjeforslaget: – Den mest alvorlege trusselen mot Kvinnherad sidan 9. april

Elektrifiseringa

Bakgrunnen for den økonomiske krisa er fleirdelt. Ein ting er at drifta av ferjene i Vestland i 2024 kostar 193 millionar meir enn det fylket får kompensert gjennom inntektssystemet til staten.

– Det er ein ganske vanvitig sum, kommenterer Kleppe.

Så har ein elektrifiseringa av ferjene, som gamle Hordaland fylke gjorde ei storsatsing på i samband med dei nye ferjeanboda frå 2020.

– Nesten heile ferjeflåten vart fornya, bortsett frå «Lærdal» og eit par andre ferjer. Fylkespolitikarane den gongen gjorde vedtaket om elektrifisering i håp om at staten skulle fullfinansiera det, men det skjedde ikkje. Så har ein staten sitt ynske om null-utslepp i denne sektoren, men dei følgjer ikkje opp med finansiering. Ein konsekvens av dette er at Vestland fylke måtte utsetja overgangen til elektriske snøggbåtar. Heller ikkje innføringa av gratis ferjer på nokre samband og halv pris på andre, er blitt fullt ut finansiert av staten, fortel Kåre Martin Kleppe.

Eit siste moment er at det generelt er dårleg økonomi i fylkes- og kommunesektoren.

Varslar prisauke og rutekutt: – Vi har ikkje noko val

Sommarferja

Kleppe meiner regjeringa no må på banen.

– Det blir urettferdig å skulda på Hans Inge Myrvold som stortingsrepresentant for Hordaland, men det er greitt om dei lokale representantane for regjeringa ser at alle fylke langs kysten slit med underfinansiering av kollektivtransporten. Fylkeskommunane sjølve har ingen verkemiddel. Dei kan ikkje ta betalt for ferjene som er gratis, eller auka prisen på strekningane som fekk halv pris, for det vil bryta med regjeringa sin intensjon. Då er kutt i ruteproduksjonen det siste alternativet, opplyser den tidlegare ordføraren på Tysnes.

Han har elles merka seg at fylkesdirektøren ikkje føreslår å ta bort sommarferja som har gått i sambandet Jondal-Tørvikbygd dei to siste åra. Prislappen på dette tilbodet er 17 millionar kroner årleg. Derimot er det kome forslag om å auka prisane på bussane i Bergensområdet, noko som har ført til reaksjonar der i garden.

– Vi kan ikkje gjera det for dyrt å reisa kollektivt, heller ikkje i Bergen. Men det blir dramatisk på ein heilt annan måte for dei lokalsamfunna som er avhengige av ferjene, vurderer Kåre Martin Kleppe.

Krast brev til fylket: – Forventar at framlegget blir lagt bort utan opphald

Reklame

Høgre har tre gonger dei siste par åra føreslege å få utgreidd reklamefinansiering av kollektivtransporten. Til dømes Trondheim og Oslo har store reklameinntekter på kollektiv, og Kleppe tykkjer det såleis ikkje er nokon grunn til at ikkje også Vestland fylke skal ha det. Han varslar difor at forslaget vil koma opp på nytt.

– Basert på tala frå andre stader, kan dette gje Vestland om lag 70 millionar kroner i årlege inntekter. Men dette nektar fleirtalet å få utgreidd. Dei er livredde for det, trass i at folk sitt på bussar og bybane og les på mobilen, der det poppar opp reklame over alt. Slik reklame vil jo også vera interessant for det lokale næringslivet. Vi vil igjen krevja å få utgreidd dette, før vi kuttar i rutene eller aukar prisane, informerer han.

Budsjettet blir den store saka framover. Saka skal opp i finansutvalet på tysdag. Høgre si gruppe på fylkestinget skal på si side ha budsjettmøte 8. og 9. november.

– Det ligg også an til kutt i skulestrukturen. Det er berre to veker sidan fylket vedtok ny struktur, men allereie no må ein gjera vesentleg meir kutt. Fleirtalet fekk vedteke ein plan som ikkje tok drifta nok ned. Innsparingsbehova er ganske store, og desse pengane må ein henta ein plass. Vi får ein krevjande jobb i budsjettprosessen, slår Kleppe fast.