Ferjeforslaget: – Den mest alvorlege trusselen mot Kvinnherad sidan 9. april

Som Grenda kunne fortelja onsdag føremiddag, har fylket i dag presentert forslag for å redusera kostnadane til ferjedrift i Vestland. Forslaget omfattar å ta bort éi ferje frå sambandet Ranavik-Skjersholmane, éi ferje frå Gjermundshamn-Varaldsøy-Årsnes, samt å leggja ned Kinsarvik-Utne.

Ordførar Vegard Bjørnevik fekk vita om framlegget like etter at det vart presentert under Hovudutval for samferdsel og mobilitet sitt møte i Sogndal i dag.

– Dette er veldig alvorleg. Eg forstår det slik at fylket har eit enormt behov for innsparingar og kuttar flatt over alt. Berre innan kollektivtransporten må dei visst kutta 131 millionar kroner. I tillegg har eg fått tilbakemeldingar om at regjeringa ikkje stiller med nok midlar til å dekka dei auka kostnadane for ferjedrifta, seier han til Grenda.

Sjokkforslag: Føreslår å ta bort ei ferje frå både Årsnes og Ranavik

Hårreisande

Bjørnevik legg ikkje skjul på at han er sjokkert over forslaget.

– Dette er den mest alvorlege trusselen mot vår kommune sidan 9. april, melder han.

Ordføraren viser til at det er tilbodet i dei tyngste innfallsportane til Kvinnherad som fylkesadministrasjonen no føreslår å halvera.

– Dette er fullstendig hårreisande! Vi er nøydd for å finna løysingar, og eg vil snarleg orientera heile kommunestyret om saka, samt ta det opp på regionrådet sitt møte no på fredag. Vi må jobba samla i regionen for at hindra at dette skal skje. Ein er nøydd for å finna pengar, fortel Vegard Bjørnevik.

– Forslaget er fullstendig uaktuelt, legg han til.

Kritisk til regjeringa

Vegard Bjørnevik slår fast at konsekvensane vil bli store med så store kutt i ferjetilbodet.

– Eg hadde aldri i min villaste fantasi sett for meg slike kuttforslag på Ranavik. Med dette kan ein berre koma seg til Kvinnherad frå vest annankvar time. Og på Årsnes vert det fullstendig krise. Men eg har stor tru på at vi skal finna løysingar, seier Bjørnevik, som meiner det må jobbast både hardt og raskt for at ikkje forslaget skal bli realitet.

Bjørnevik er elles kritisk til regjeringa si handtering av kollektivsektoren og dei auka kostnadane for fylka.

– Eg har jo høyrt at fylka meiner regjeringa ikkje har følgd opp med å dekka kostnadane, som mellom anna gratis ferjer har ført med seg. I så fall er det ei fallitterklæring frå regjeringa mot distrikts-Norge, kommenterer han.