Ferjeavløysingsmidlane: – Slik det er no får vi ikkje realisert viktige vegprosjekt

Ferjeavløysingsordninga frå 2016 går ut på at fylkeskommunane kan bruka pengar som i dag går til ferjedrift, til å finansiera fastlandssamband som erstattar ferjesambandet. For tida er det berre eitt slikt prosjekt under bygging i Vestland fylke; Ytre Steinsund bru i Sogn. Der skal ei bru på 811 meter og 4365 meter ny veg erstatta ferjesambandet Daløy-Haldorsneset, og syta for at innbyggjarane på Ytre Sula får døgnope samband til kommunesenteret Hardbakke.

Går 40 år

I starten av oktober handsama fylkestinget i Vestland ei sak om finansiering av ferjeavløysingsprosjekt. Politikarane vil jobba vidare med forbetringar av støtteordninga.

– Ferjeavløysingsordninga til staten er i utgangspunktet til god hjelp med slike vegprosjekt, men den gjer det ikkje gratis. Det er eit problem at fylkeskommunen ber heile den økonomiske risikoen i desse store prosjekta. Dei blir erfaringsmessigt dyrare, det er mykje kostnadsauke vi ikkje får dekka, og det kan gå 40 år før vi får att byggekostnadane. Vår økonomiske belastning må reduserast for at vi skal kunne byggja fleire fastlandsprosjekt, seier fylkesordførar Jon Askeland til fylket si heimeside.

Ni prosjekt

Vestland fylke har ni «bru for ferje»-prosjekt som er godkjente av staten som ferjeavløysingsprosjekt. Blant dei er Huglo-sambandet, Sunnfast og Fjelbergsambandet.

Fylkestinget ber no departementet gjera rentekompensasjonsordninga i ferjeavløysingsprosjekt om til ei varig ordning, utan krav om ferdigstilling innan 2027. Vidare ber dei om at den årlege ramma til rentekompensasjon blir auka, slik at fleire ferjeavløysingsprosjekt kan nytta ordninga samstundes.

– Brevet til Samferdselsministeren er allereie sendt. Det er fylkeskommunane som må lånefinansiera prosjekta, det er vi som byggjer ut, og vi som no må ta all økonomisk risiko over lang tid. Vi gir oss ikkje på at dette er gode prosjekt, men finansieringa må endrast, seier Jon Askeland.