Fekk svar om Uskedalen barnehage
I samband med at Dønhaug gardsbarnehage skal leggja ned, vurderer kommunen å utvida kapasiteten i Uskedalen barnehage. Dette kjem fram etter eit spørsmål i Kommunestyret.
Dønhaug gardsbarnehage i Uskedalen har bestemt å leggja ned drifta til sommaren. Det får konsekvensar for andre barnehagar. I førre kommunestyremøte bad Jostein Saghaug (MDG) om ein statusrapport for Uskedalen barnehage. «I lys av at alle barna i gardsbarnehagen er lova plass der frå juni/juli 2025. Personell, areal, økonomiske konsekvensar, ombygging, medverknad frå tilsette?», skreiv han i spørsmålet.
I protokollen frå møtet svarar kommunedirektøren at foreldra som i dag har barn i Dønhaug gardsbarnehage, har søkt om ny plass i ulike barnehagar.
Annonse
«Alle barna har fått plass der foreldra har søkt om plass. Dei fleste barna skal gå i Uskedalen barnehage, men det er også foreldre som har søkt barna sine til andre stadar», står det.
Treffsikker
Kommunedirektøren opplyser vidare at det no blir vurdert å gjera mindre ombyggingar i Uskedalen barnehage for å auka kapasiteten noko.
«Dette er arbeid som er rekna for å ha mindre økonomisk konsekvens. Auka budsjett til kommunale barnehagar vil bli finansiert av redusert tilskot til private barnehagar. Budsjettfordelinga vil vera meir treffsikker ved å gjera ei omfordeling i revidert budsjett. Plasstillitsvalte har vore ein del av prosessen, mellom anna kring auke av kapasiteten i barnehagen», heiter det i protokollen.
